|
| 1 |
|
| Chuku m! Chuku m! Kị haịn i gi la m tọ? Kị haịn i gilẹni rị nsue n'ị zụọpụha m?! Kị haịn i gilẹni rị nsue n'ị nụ udẹn m rị a sụn?! |
|
| 2 |
|
| Euu Chuku m, a kpọku m'i efinaị, y'a zanị; a kpọkuzịkwọ m'ị uhinhin, ẹhụ emẹni m jụụ. |
|
| 3 |
|
| Kanị ịyụ wụ Eze, Onyẹ hụn rị nsọ! Ịyụ kẹ ndị Izrẹlụ rị a ja mma; |
|
| 4 |
|
| ịyụ kẹ ndị nẹdi ẹnyi kanị gi dọn ẹnya — e gi wẹ i dọn ẹnya, ị nọ zụọpụha wẹ! |
|
| 5 |
|
| A kpọku wẹ i, wẹ nọ hụn isi wanahịn; wẹ gi i dọn ẹnya, o kpuyeni wẹ. |
|
| 6 |
|
| Kanị m wụhụ ndidọn, ẹlẹzidẹ ịhịan — ịhịan hụ a kpari m, ndị alị hụ e lelịa m! |
|
| 7 |
|
| Ndị ile hụnnị m hụ a mụ m ẹmụ, a kpari m, e finfinni m isi, a sị, |
|
| 8 |
|
| “Ọ tụkwasị Osolobuẹ obi! Osolobuẹ ya zụọpụha a nwan! Ya zụọpụha a nwan — ebe o mẹni ihiẹn ẹ asụọka Osolobuẹ!” |
|
| 9 |
|
| Bụ ịyụ gha ẹfọ nnẹ m wepụha m pẹrẹ; ịyụ mẹ obi ru m alị kẹ m rịdẹ a ra ẹran nnẹ m. |
|
| 10 |
|
| Ịyụ rị e lepụ m ẹnya kẹ m rịdẹ ẹfọ nnẹ m; kete nnẹ m mụlẹ m, ịyụ wụ Chuku m. |
|
| 11 |
|
| Dodo, anọtelẹ nwan ebe m rị, makẹni nsọngbu rị nsue, bụ onwọnni onyẹ k'e yeni m ẹka. |
|
| 12 |
|
| Ndị-iṅẹnrẹn e fihunmẹgụọ m kẹ okẹn-efin, okẹn-efin alị Bashanị zeni e fihunmẹgụọ m. |
|
| 13 |
|
| Wẹ hụ a shịapụnị m ọnụ, rịkẹ ẹwọrọ rị e ri, e dẹn. |
|
| 14 |
|
| Ndụn hụ a gụ m, rịkẹ ebe wẹ rị e hupụ mirin. Ọkpụkpụ m ile e kwọnpụchanrịngụọ. Obi rị m hụ kẹ udẹn, o dẹnhinchanrịngụọ. |
|
| 15 |
|
| Ndụn a gụgụọ m kẹ ite-ụrụa kpọgụ nkụn, ire a nyanrịn m okpo! Y'e bugụọ m che imẹ ẹjan kẹ ndị nwụnnị. |
|
| 16 |
|
| Ndị-iṅẹnrẹn e kehunmẹgụọ m kẹ nkitẹ; itu ndị-ejẹ e kehunmẹgụọ m, dọyịya m ụkụ lẹ ẹka kẹ ẹwọrọ e mẹ. |
|
| 17 |
|
| Nị m saghọdẹ ẹka gụnmarịn ọkpụkpụ m ile; wẹ hụ a gba m ilee, a mụ m. |
|
| 18 |
|
| E keri wẹ ẹwuru ndị m yi — a tụ wẹ mkpọ keri ẹwuru ndị m yi. |
|
| 19 |
|
| Euu Osolobuẹ, yụ nwẹn anọtelẹ ebe m rị; euu Ikẹn m, bịakẹnrin d'e yeni m ẹka! |
|
| 20 |
|
| Zụọpụha m, amamgbe w'e gi ọpịa-agha gbu m; zụọpụha ndụn m ẹka nkitẹ ndịnị. |
|
| 21 |
|
| Zụọpụha m ọnụ ẹwọrọ! Zụọpụha m, amamgbe okẹn-efin ẹra ndịnị e gi mpịn sụngbu m! |
|
| 22 |
|
| M k'a gwa umunẹ m ihiẹn i mẹ; m k'a nọ igunrun ndị nke i ja ị mma. |
|
| 23 |
|
| Ụnụ ndị a tụ egun Osolobuẹ, ja nị Osolobuẹ mma! Ụnụ ile Jekọpụ mụ, gbaye n'ẹ! Tụ nị egun ẹ, ụmụ Izrẹlụ ile, |
|
| 24 |
|
| makẹni o legberini mọbụ lelịa afụnfụn onyẹ wẹ rị a bịangbu rị a ta; o bupụn'a ihun — ọ zaghọ a k'ọ kwan ẹkwan eyemẹka! |
|
| 25 |
|
| M k'e gi ihiẹnni i mẹni m ja ị mma imẹ ozuzu-uku ndị nke i, m k'a nọ idẹnya ndị hụn e fen'i mẹzu nkwa m kwe i. |
|
| 26 |
|
| Ndị igbẹnnyẹ k'e ri, rijun ẹfọ; ndị ile e fe Osolobuẹ k'a ja a mma. Obi ụnụ ya rị ndụn jẹnrin ejẹn! |
|
| 27 |
|
| Ndị rị ebe ile rị elu-ụwa jẹnkọ d'a nyanhan, femẹ Osolobuẹ; ndị alị ile rị ichẹn-ichẹn k'e fe ẹ. |
|
| 28 |
|
| Makẹni, ọkịkị rị ẹka Osolobuẹ; ịya rị a kị alị ile. |
|
| 29 |
|
| Wẹ k'e rigụ, hulụan'a isi — kẹ ndị uku ile rị elu-ụwa; ndị ile a nwụnnị k'a kụn'a isi-alị, ndị ile ghalẹni a s'ẹka e dọnmẹ enwẹn wẹ ndụn. |
|
| 30 |
|
| Agbọ ndị rị ihun k'e fe Osolobuẹ; agbọ ndị rị ihun k'a nụ banyeni Osolobuẹ. |
|
| 31 |
|
| O ru, wẹ sikọ d'a gwazị ndị wẹ kelẹni mụ kikẹnni kẹ Osolobuẹ dọn tụnị ndị nke ẹ ụya, nị o mẹgụọ a. |
|
|
|
|