×

Ekitabo Erikwera 2008

Zaaburi 22

1
Ruhanga wangye, Ruhanga wangye, ahabw'enki ontsigireho? Ebigambo by'okuganya kwangye ka bifiire busha!
2
Ruhanga wangye, nkweta eizooba ryona, toonyetaba, ndaara nimpooga, timpuumura.
3
Haza kunu ori Orikwera, osingami ahagati y'Abaisiraeli nibakusingiza.
4
Niiwe baatataitwe baayesigire; bakakwesiga, waabajuna.
5
Bakakutakira, waabakiza; tibakakwesigiraga busha.
6
Kwonka nyowe hati ndi omunyongororwa, tinkiri muntu! Omu bantu ndi ekihemu ekirikugaywa boona.
7
Abarikundeeba boona bampema, bampa mutinzi nibanshekyeerera, bati:
8
Akeesiga Nyakubaho, k'abe niwe yaamucungura! Ku araabe ari munywani we, naamujune!
9
Manya niiwe waanyihire omu nda ya maawe, kandi okandinda nkiri aha mabeere ge.
10
Okwiha obu naazaarwa niiwe oba Ruhanga wangye.
11
Otanza hare, ahabw'okuba akabi kari haihi, tiinyine kihwera!
12
Abazigu baingi baanyehinguririize nk'enimi, bantangatangire nk'enimi z'amaani eza Bashani.
13
Baanyashamiire, basheegire nibatsinda nk'entare.
14
Nsheeshekire nk'amaizi, amagufa gangye goona gataine. Omutima gwangye guri nk'enzibuuro erikuyaga, niguyagira omu nda yangye.
15
Enkanka enyomire nk'orugusyo, orurimi rwangye ruramataine n'enshaya.
16
Omuna gw'embwa guunyehinguririize; enkozi z'ebibi zintangatangire; bankomire emikono n'amaguru, bantsiga ngarami omu mucuucu, ndi ow'okufa.
17
Nimbaasa kubara amagufa gangye goona. Abazigu bangye bampangire amaisho nibashunga;
18
nibabagana ebijwaro byangye, n'emyenda yangye nibagiteerera enteenyu.
19
Ai Nyakubaho, otanza hare! Iwe maani gangye, rahuka kunjuna!
20
Onjune rurara, n'amagara gangye ogakize embwa zibambaire.
21
Onyihe omu maino g'entare, ndekye kwitwa kubi amahembe g'embogo.
22
Ndyarangaana eiziina ryawe omuri beene waitu, nkuhimbisize omu ruteerane ruhango, nti: Imwe abatiina Nyakubaho, mumusingize!
23
Naimwe oruzaaro rwona orwa Yakobo, mumuhe ekitiinwa! kandi naimwe orwa Isiraeli, mumutiine.
24
Manya taragayire mworo aitsirwe enaku, nobu kwakuba okumunuga; kandi taramwimire maisho, kureka ku yaamutakiire, yaamwetaba.
25
Niiwe mpimbisa omu ruteerane rukuru. Ndyahikiiriza okuhiga kwangye omu maisho g'abamutiina.
26
Abooro baryatunga ebi barikwenda, barye bahaagye. Abasherura Nyakubaho baryamuhimbisa. Emitima yaabo neekamereere!
27
Ab'ensi yoona baryaijuka Nyakubaho, bamugarukire, n'enganda zoona ez'omu mahanga zimuramye.
28
Manya Nyakubaho aba omugabe, otegyeka amahanga goona!
29
Abanyamaryo b'omu nsi yoona baryamuramya, n'ab'okugaruka omu mucuucu boona bamutangirire; naanye niwe arimbaisaho,
30
n'abaana bangye bakamuheereza.
31
Abantu baryarangirira ab'obusingye oburiija ebya Mukama, bamanyise abatakazairwe eby'okuhikiirira kwe. Ebyo byona niwe yaabikozire.
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes