×

Ika Bible 2018

Ẹbụ-ọma 25

1
Euu Osolobuẹ, ịyụ kẹ m we enwẹn m ye;
2
ịyụ wụ Chuku m kẹ m gi dọn ẹnya. Anịlẹ ifẹnrẹn mẹ m, anịlẹ ndị-iṅẹnrẹn m mẹri m.
3
Onwọnni onyẹ gi i dọn ẹnya ifẹnrẹn k'e mẹ, kanị ifẹnrẹn k'e mẹ ndị ihunnaị nwọnlẹni isi.
4
Dodo Osolobuẹ, ghọsị m ụzọ ị; zin m kẹ m'a dọn gha ụzọ ị;
5
gi ezioku i du m, kuzi m, makẹni ịyụ wụ Chuku m lẹ Onyẹ-nzụọpụha m, ịyụ sụọ kẹ m gi e dọn ẹnya kẹ ụhụọhịn han.
6
Osolobuẹ dodo, nyanhan okẹn omikẹn i lẹ ihiẹn-ọsụsụọ ị, makẹni uwẹ kẹ wẹ gi marịn ị ẹdẹi.
7
Dodo anyanhanlẹ njọ m mẹ kẹ m rị okoro lẹ ebe m nọsọnmẹ fe isi; gi ufiri ihiẹn-ọsụsụọ ị nyanhan m, makẹni yụ wụ Osolobuẹ a rịka mma.
8
Onyẹ rị mma lẹ onyẹ zinrinni kẹ Osolobuẹ wụ; ya haịn o gi a kuzi ndị-njọ ụzọ a.
9
O zin ndị welụa enwẹn wẹ alị kẹ wẹ dọn e mẹ ihiẹn rị mma, a kuzi wẹ kẹ wẹ dọn e sọn ụzọ a.
10
Ụzọ Osolobuẹ ile wụ ihiẹn-ọsụsụọ ihiẹn-ọsụsụọ lẹ ihiẹn wẹ gi e dọn ẹnya — ebe ndị e mẹ ihiẹn Iwu ẹ chọ rị.
11
Euu Osolobuẹ, gi ufiri ẹfan ị gbagharị m njọ m, ọsụọn'a n'o hikẹ.
12
Onyẹ wụ nwan onyẹ ahụn a tụ egun Osolobuẹ? Osolobuẹ k'e zin ẹ k'o dọn gha ụzọ ọ họtọn'a.
13
O k'a rịnị hụnyẹ mma ndụn a ile, ẹbozo ẹ k'e nwọnrin alị wẹ rị.
14
Ndị a tụ egun Osolobuẹ k'ọ gwa uche ẹ, o mẹ wẹ a ghọta Iwu ẹ.
15
Osolobuẹ kẹ m bu ẹnya zinmẹ ogẹn ile, makẹni ya sụọ k'e wepụha ụkụ m imẹ ọnyan.
16
Dodo lee m ẹnya n'i mẹni m omikẹn, makẹni wẹ rị e mẹkpa m ẹhụ bụ mmẹ sụọ rị.
17
Iroro rị m obi a wayegụọ; dodo, gbapụha m imẹ afụnfụn m.
18
Lee kẹ wẹ rị a bịangbu m lẹ afụnfụn m rị a ta, n'i wepụ njọ m ile.
19
Lee ihiẹn ndị-iṅẹnrẹn m barahị lẹzi kẹ iwe m rị e wehan wẹ.
20
Dodo, che ndụn m nche, zụọpụha m; anịlẹ ifẹnrẹn mẹ m, makẹni yụ kẹ m gbọnni.
21
Ezioku lẹ obibi kụrụ ọtọ wẹ chemẹ m, makẹni yụ kẹ m gi dọn ẹnya.
22
Chuku dodo, gbapụha ndị Izrẹlụ imẹ nsọngbu wẹ ile!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes