×

Ang Biblia 1982

SALMO 27

1
Ang Ginoo akon kapawa kag akon kaluwasan; sin-o bala ang kahadlukan ko? Ang Ginoo amo ang kalig-onan sang akon kabuhi; sin-o bala ang kahangaw-an ko?
2
Sang nag-abut sa akon ang mga manughikot sang malaut, sa pagkaon sang akon unud, ang akon mga kasumpung kag ang akon mga kaaway, nasandad sila kag napukan.
3
Bisan ang kasoldadosan magpahamtang sing dologan batok sa akon, ang akon tagiposoon dili mahadluk; bisan ang inaway mag-abut batok sa akon, walay sapayan magasalig ako.
4
Isa ka butang ang ginpangayo ko sa Ginoo, nga pangitaon ko; nga makapuyo ako sa balay sang Ginoo sa tanan nga adlaw sang akon kabuhi, sa pagtan-aw sang katahuman sang Ginoo, kag sa pagpamalandong sa iya templo.
5
Kay sa adlaw sang kagamo tagoon niya ako sa iya layanglayang; sa palasilongan sang iya kayangkayang tagoon niya ako, itungtung niya ako sa igang.
6
Kag karon ang akon olo manginlabaw sa akon mga kaaway sa palibut nakon; kag magadolot ako sa iya layanglayang sing mga halad sang kasadya; magaamba ako kag magaamba sing mga pagdayaw sa Ginoo.
7
Pamatii, O Ginoo, kon magtuaw ako sa akon tingug, kalooyi man ako kag sabta ako!
8
Nagsiling ka, “Pangitaa ang akon nawung.” Ang akon tagiposoon nagsiling sa imo, “Ang imo nawung, Ginoo, pangitaon ko.”
9
Dili pagpalipdi ang imo nawung sa akon. Dili pag-isikway sa kaakig ang imo alagad, ikaw nangin-akon bulig. Dili ako pagsobola, dili ako pagbayai, O Dios sang akon kaluwasan!
10
Kon magbiya sa akon ang akon amay kag akon iloy, niyan ang Ginoo magasapopo sa akon.
11
Tudloi ako sang imo dalanon, O Ginoo; kag tuytuyi ako sa banas nga matapan bangud sang akon mga kaaway.
12
Dili ako pag-itugyan sa kabubut-on sang akon mga kasumpung; kay ang dimatuud nga mga saksi nagatindug batok sa akon, kag ang mga nagapusnga sing kapintas.
13
Napunaw ako kuntani kon wala ako magtoo sa pagtan-aw sang pagkaayo sang Ginoo sa duta sang mga buhi.
14
Hulata ang Ginoo; magpakabakud, kag magpakaisug ang imo tagiposoon; hoo, hulat ka sa Ginoo!
Ilonggo Bible 1982
Ang Biblia 1982 Philippine Bible Society
:
Save Notes