×

Adamawa 1994

Jabuura 28

1
Yimre Daawuda. Yaa Jawmiraawo, mi ɗon toro ma. An tapaare hisrude am, taa sukku noppi ma! To a jeeɗake, mi laatoto bana gooto caka nastanɓe ngaska lugguka.
2
Nan torɗe am to mi wookani ma ngam tefugo ballal, to mi ɓaŋgti juuɗe am gal nokkuure ma ɓurnde senaago!
3
Taa halkam hawtaade bee halluɓe e waɗooɓe zunuuba! Ɓe ɗon mbolwana heeddiɗɗiraaɓe maɓɓe bolle belɗe, ammaa halleende heewi ɓerɗe maɓɓe.
4
Hiitu ɓe fodde kuuɗe maɓɓe kalluɗe fuu! Hiitu ɓe fodde kuuɗe ɗe juuɗe maɓɓe kuuwi! Hokku ɓe ngeenaari kuuɗe maɓɓe!
5
Ngam kamɓe ɓe paalataa kuuɗe Jawmiraawo e ko juuɗe maako mbaɗi. Ngam maajum o do'an ɓe, o ummintaa ɓe sam.
6
Yettoore laatano Jawmiraawo, ngam o nani torɗe am!
7
Jawmiraawo woni semmbe am e wawarde am, ɓernde am ɗon hoolo mo. O walli yam, ɓernde am ɗon seyo, mi yettan mo bee yimre am.
8
Jawmiraawo woni semmbe ummaatoore mum, kaŋko woni hisrude hisnannde laamiiɗo mo o suɓi ɗum.
9
Hisnu ummaatoore ma, barkiɗin yimɓe ɓe marɗa! Laata gaynaako maɓɓe e balloowo maɓɓe haa foroy!
Fulfulde Bible Adamawa 1994
DEFTERE ALLAH Alliance Biblique du Cameroun, 1994
:
Hisnu Teskorɗe