×

မြန်​​​မာ့​​​စံ​​​မီ​​​သမ္မာ​​​ကျမ်း

ဆာလံကျမ်း ၂၉

1
အို ကောင်းကင်​သား​တို့​၊ ထာဝရဘုရား​ကို​သိမှတ်ဝန်ခံ​ကြ​လော့​။ ဘုန်းအသရေ​နှင့်​အစွမ်းသတ္တိ​သည် ထာဝရဘုရား​နှင့်​ဆိုင်​ကြောင်း သိမှတ်ဝန်ခံ​ကြ​လော့​။
2
နာမ​တော်​၏​ဘုန်းအသရေ​သည် ထာဝရဘုရား​နှင့်​ဆိုင်​ကြောင်း သိမှတ်ဝန်ခံ​ကြ​လော့​။ သန့်ရှင်း​ခြင်း​အသရေ​တော်​နှင့်​ပြည့်စုံ​သော ထာဝရဘုရား​ကို ရှိခိုးကိုးကွယ်​ကြ​လော့​။
3
ထာဝရဘုရား​၏​အသံ​တော်​သည် ရေ​ပေါ်၌​ရှိ​တော်မူ​၏​။ ဘုန်းကြီး​သော​ဘုရား​သည် ထစ်ချုန်း​တော်မူ​၏​။ ထာဝရဘုရား​သည် များစွာ​သော​ရေ​ပေါ်၌​ရှိ​တော်မူ​၏​။
4
ထာဝရဘုရား​၏​အသံ​တော်​သည် တန်ခိုး​နှင့်​ပြည့်စုံ​တော်မူ​၏​။ ထာဝရဘုရား​၏​အသံ​တော်​သည် ဘုန်းအာနုဘော်​နှင့်​ပြည့်စုံ​တော်မူ​၏​။
5
ထာဝရဘုရား​၏​အသံ​တော်​သည် သစ်ကတိုးပင်​တို့​ကို ကျိုး​စေ​တော်မူ​၏​။ အကယ်စင်စစ် ထာဝရဘုရား​သည် လက်ဘနွန်​သစ်ကတိုးပင်​တို့​ကို ကျိုး​စေ​တော်မူ​၏​။
6
ကိုယ်တော်​သည် လက်ဘနွန်​ကို နွားသငယ်​ကဲ့သို့​လည်းကောင်း​၊ စိရုန်​ကို နွားရိုင်းကလေး​ကဲ့သို့​လည်းကောင်း ခုန်ပေါက်​စေ​တော်မူ​၏​။
7
ထာဝရဘုရား​၏​အသံ​တော်​သည် မီးတောက်​မီးလျှံ​များ​ကို ထွက်ပေါ်​စေ​တော်မူ​၏​။
8
ထာဝရဘုရား​၏​အသံ​တော်​သည် တောကန္တာရ​ကို​တုန်လှုပ်​စေ​တော်မူ​၏​။ ထာဝရဘုရား​သည် ကာဒေရှ​တောကန္တာရ​ကို တုန်လှုပ်​စေ​တော်မူ​၏​။
9
ထာဝရဘုရား​၏​အသံ​တော်​သည် သမင်​တို့​ကို​သားဖွား​စေ​၍ သစ်တော​များ​ကို ပြောင်တလင်းခါ​စေ​တော်မူ​၏​။ ကိုယ်တော်​၏​ဗိမာန်တော်​၌​ရှိသမျှ​တို့​က “​ဘုန်းကြီး​စေ​သတည်း​”​ဟု ကြွေးကြော်​ကြ​၏​။
10
ထာဝရဘုရား​သည် လွှမ်းမိုး​သော​ရေပြင်​အထက်​တွင် စိုးစံ​တော်မူ​၏​။ ထာဝရဘုရား​သည် ရှင်ဘုရင်​အဖြစ် အစဉ်အမြဲ​စိုးစံ​တော်မူ​၏​။
11
ထာဝရဘုရား​သည် မိမိ​၏​လူမျိုး​တော်​အား အစွမ်းသတ္တိ​ကို​ပေး​တော်မူ​၏​။ ထာဝရဘုရား​သည် မိမိ​၏​လူမျိုး​တော်​အား ငြိမ်းချမ်း​ခြင်း​ကောင်းချီးမင်္ဂလာ​ကို​ပေး​တော်မူ​၏​။
Burmese Bible MSBU
MYANMAR STANDARD BIBLE 2012, 2014, 2017, 2021 by Global Bible Initiative
:
မှတ်စုများကိုသိမ်းဆည်းပါ