×

Bukuit Ne Tilil RV 2015

TIENWOGIKAL 29

1
Ogoochi Kamuktaindet ne Toroor, ee okweek weeriigap che kiimeen, ogoochi Kamuktaindet ne Toroor teegisto ak kimnateet.
2
Ogoochi Kamuktaindet ne Toroor teegisto ne nyoljin kainennyi; ogutung'ji Kamuktaindet ne Toroor eng' telunatetap tiliilindo.
3
Miitei tweguunetap Kamuktaindet ne Toroor nyanjosyek; tulei Kamuktaindetap teegisto, nooto Kamuktaindet ne Toroor, ne mi paragutap peek che chaang'.
4
Tinyei kimnateet tweguunetap Kamuktaindet ne Toroor; nyiitaat `etunateet tweguunetap Kamuktaindet ne Toroor.
5
Iriei `tweguunetap Kamuktaindet ne Toroor taragonik; tonatoni `Kamuktaindet ne Toroor taragonik che po Lebanon.
6
Igoochin `Kamuktaindet ne Toroor tuloonoogap Lebanon kotorombenso ko uu moita; ak tulweetap Sirion, ko uu moitap soet.
7
Petei tweguunetap Kamuktaindet ne Toroor laletap maat.
8
Itumdumi tweguunetap Kamuktaindet ne Toroor surkwen; itumdumi Kamuktaindet ne Toroor surkwen ne po Kadesh.
9
Igoochin tweguunetap Kamuktaindet ne Toroor kenyelok koiiyo, ak chorori keetiigap timiin; ak mwaei age tugul ne mi hekalunnyi kole, “Po Kamuktaindet ne Toroor Toroornatet!”
10
Tebee Kamuktaindet ne Toroor maraneet ko uu laitoryat; tebyei Kamuktaindet ne Toroor kolaitorani koigeny.
11
Igoochin `Kamuktaindet ne Toroor piikyik kimnateet! Ingoberuuri `Kamuktaindet ne Toroor piikyik eng' kaalyeet!
Kalenjin Revised Bible 2025
Kalenjin Revised Bible Catholic Edition Bible Society of Kenya, 2015
:
Save Notes