×

Fɔs Oli Baybul 2013

Sam 29

1
Enjɛl dɛn, una prez PAPA GƆD, una tɔk bɔt aw i wɔndaful! Una tɔk bɔt di big big pawa we i gɛt.
2
Una gi PAPA GƆD di prez we i fit fɔ gɛt; bikɔs in na big PAPA GƆD; mek una wɔship PAPA GƆD piɔ wan lɛkɛ insɛf.
3
Una kin yɛri we PAPA GƆD de tɔk, we di wata de splash na di si; dis wɔndaful PAPA GƆD in vɔys tan lɛk tɛnda yu kin yɛri PAPA GƆD in vɔys insay di dip dip si.
4
PAPA GƆD in vɔys pawaful; PAPA GƆD in vɔys de tɛl wi aw i wɔndaful.
5
PAPA GƆD in vɔys so pawaful dat wɛn i tɔk di sida tik, we trɔŋ pas ɔl de brok ivin sida tik we dɛn pul kɔmɔt Libanɔn.
6
In vɔys de mek di mawnten dɛn na Libanɔn jomp lɛk rabit dɔn Mawnt Amɔn in kin jomp lɛk kaŋaru.
7
PAPA GƆD in vɔys kin nak yu dɔŋ lɛk aw laytin de flash.
8
PAPA GƆD in vɔys de shek ɛni ɛmti land we pɔsin nɔ go ebul tap; ivin di ɛmti land we pɔsin nɔ go ebul tap na Kedɛsh.
9
PAPA GƆD in vɔys de shek Ok tik ɛn twis twis am ɛn trip di tik dɛn na di bush nekɛd. Ɔl udat de insay PAPA GƆD in os de ala “Glori!”
10
PAPA GƆD sidɔm lɛk kiŋ de kɔmand di si; PAPA GƆD sidɔm lɛkɛ Kiŋ ɛn nain na Kiŋ sote go.
11
PAPA GƆD de gi trɛnk to in pipul; lɛ PAPA GƆD blɛs in pipul ɛn gi dɛn ɔl wetin dɛn want fɔ ɛnjɔy layf.
Krio Bible 2013
Krio Bible The Bible Society of Sierra Leone, 2013
:
Sev Notis dɛn