1
Euu Osolobuẹ, ịyụ kẹ m gbọnni; anịkwọlẹ ifẹnrẹn mẹ m! Gbapụha m makẹni ị wụ onyẹ ezi-omumẹ!
2
Dodo, gọn m ntịn; d'a zụọpụha m ozigbo-ozigbo! Wụrụnị m ọmụma m'a gbaban, ebe zeni m nọ a wanahịn.
3
Ebe o mẹni ịyụ wụ ọmụma m lẹ ụlọ zeni m'a gbaban, gi nwan ufiri ẹfan ị du m, a gwa m ebe m k'a zọye ụkụ.
4
Alalẹ m tọnị ọnyan wẹ shitọnị m nzuzue, nị ịyụ kẹ m gbọnni.
5
E bu m mmọn m che i ẹka; dodo, zụọpụha m, Osolobuẹ hụn furu wẹ gi e dọn ẹnya.
6
Ize ndị hụn a danbemẹ mmọn nwọnlẹni isi e ze m e ze, Osolobuẹ kẹ mmẹ nwẹn gi e dọn ẹnya.
7
M k'a ghọghọ makẹ ihiẹn-ọsụsụọ ị, ẹfọ a sụọ m ụsụọ, makẹni y'a hụnghọ afụnfụn m rị a ta, y'a marịngụọ ihiẹn rị e sọngbuni m;
8
y'e weni m che ẹka ndị-iṅẹnrẹn m — kama, y'e mẹgụọ m hụn ebe shịanị zọye ụkụ.
9
Osolobuẹ dodo mẹ omikẹn m, nị m rị imẹ nsọngbu; a kwan m ẹkwan, ẹnya e d'a kpọhị m, umẹ-ndụn lẹ ẹhụ a rọchanrịngụọ m yeni ẹkwan.
10
M'e d'a nwụn yeni ẹkwan; m'e d'a nwụnchu yeni ẹkwan; njọ m mẹ a gụchanrịngụọ m ndụn, gụ m ndụn d'e rudẹ imẹ ọkpụkpụ.
11
Ufiri ndị-iṅẹnrẹn m ile, ibe m ara nọkunmẹzi m kaka; egun anịnị ndị marịnnị m nọkunmẹ m; ndị rị ogbe hụn m, a gbama wẹ ọsọ.
12
A zọgụọ wẹ m, rịkẹ sị a nwụnhụngụọ m; m rị nwan kẹ ite ụrụa tikpọnị hụn nwọnzilẹni ihiẹn wẹ gi ẹ e mẹ.
13
M hụ a nụ eje-ihiẹn ndị bu ọda rị e ku — ihiẹn egun e fihunmẹgụọ m azụụn ile; wẹ hụ e zuni m umẹ, e zuni m eje-umẹ ni wẹ gbu m.
14
Kanị ịyụ kẹ m rị e lee ẹnya, Osolobuẹ; m hụ e ku ẹ nị “Ịyụ wụ Chuku m.”
15
Ihiẹn ile gbashịarịnị m rị ị ẹka; dodo, zụọpụha m ẹka ndị-iṅẹnrẹn m lẹ ndị rị a chụnị m.
16
Dodo, lee odibo i ẹnya ihun, zụọpụha m makẹni y'e mẹyeni onyẹ nke i.
17
Osolobuẹ, dodo anịkwọlẹ ifẹnrẹn mẹ m — ni ịyụ kẹ m rị a kpọku; ifẹnrẹn ya mẹ ndị-njọ; wẹ shi alị-mmọn d'a gba nkịtịn.
18
Kpumẹ wẹ ọnụ wẹ gi a tụ ntụ, makẹ mpache lẹ nlegberi wẹ rị e gi e kukarị enwẹn wẹ — ebe wẹ rị a kpari onyẹ ezi-omumẹ.
19
Lee ihiẹn ile rị mma i nwọn — hụn i butọnị ndị a tụ egun i, hụn y'a rụnnị ndị gbaburun'i hụn ya rụn idẹnya ịhịan ile.
20
Y'e bu ndị gbọnnin'i zuemẹ okpuru i ebe ị rị, makẹ ndị rị e zuni wẹ eje-umẹ; y'e kpumẹ wẹ makẹ ndị rị a ma wẹ ikpe.
21
Ịja-mma ya rịnị Osolobuẹ makẹni ọ ghọsịgụọ ihiẹn-ọsụsụọ a k'o dọn e mẹ — ogẹn wẹ gi kehunmẹ m imẹ obodo ohu!
22
E te gigụọ m egun sị enwẹn m, “a chụpụgụọ wẹ m ebe yụ wụ Osolobuẹ rị”. Kanị ị nọ nụ ẹkwan m ogẹn m gi rịọ n'i mẹni m omikẹn — ogẹn m gi kwanburu i n'i yeni m ẹka.
23
Ihiẹn Osolobuẹ ya sụọma ụnụ, ụnụ ndị nsọ a. Osolobuẹ e dọnmẹ ndị e mẹ uche ẹ, kanị, o ye ndị a pacheni afụnfụn furuni wẹ, e ye wẹ ya mmagi-mmagi.
24
Turu ni, ụnụ e kwọndọn obi ụnụ — ụnụ ile hụn bu ẹnya zinmẹ Osolobuẹ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc