1
Amang’un inye, ee Jehovah; ameng’alilan agoi: Sorua eng’ imandang’ung’.
2
Epcha it; sorua chokyi: Egu ruandet ne kim eng’ ane, got ne aung’ege kosorua.
3
Amu inye ko i ruandennyu ak irimennyu; Eng’ noto anyun indoiywa amu kaineng’ung’ ak imutata.
4
Imaanda eng’ mestet ne kigiriich agobo ane eng’ ung’ot; Amu inye ko i kimnatennyu.
5
Kande tamirmiriennyu eung’ung’: Kiitiacha, ee Jehovah, inye Kamuktaindet ne bo imanit.
6
Aweche ichek che isubi atebosiek che manyolu che bo lembech: Ago amang’u Jehovah.
7
Agasige ak abaibaitu eng’ rireneng’ung’: Amu kiigeer nyalildanyu; Kiinai sobondanyu eng’ betusiekab nyalilda:
8
Ama ichamde konama eutab bunyot; Kiicham kotonone kelyekyuk ole bara.
9
Rirena, ee Jehovah, amu ami nyalilda: Machei kobek konyekyuk amu arogenet, koboto sobondanyu ak bortanyu.
10
Kagowong’gei betusiekyuk amu arogenet, ak kenyisiekyuk eng’ tigenet: Kagorarua kimnatet amu tengektanyu, ak kagoosegitu kowekyuk.
11
Kaegu ne itewerat amu bunikyuk tugul, Ee, ne siirei ko bikab kokwennyu, ak kiaegu kit ne kiywei agot eng’ bik che kogingengei: Kimweena che kigeera eng’ sang’.
12
Kigeutiena ko u chi ne kigome ne magibwati: Kiaige teret ne kigoiye.
13
Amu kiagas kataamsetab che chang’, Kigoyiema kamuiset: Ye kituiyogei koruoch agobo ane, Kicheng’ei oret ne barena.
14
Ago kiamang’un inye, ee Jehovah: Kiale, Inye ko i Kamuktaindennyu.
15
Mitei betusiekyuk eung’ung’: Sorua eng’ eunekab bunikyuk, ak eng’ ichek che onwa.
16
Ingokweny togeng’ung’ kiboitiondeng’ung’. Sorua eng’ chamnyeng’ung’ ne tala.
17
Ameng’alilan, ee Jehovah; amu kaaguurin: Ingolilanso kiptengeginik, ingosisyo eng’ oldab meet.
18
Ingonamak kut kiplembechonik; Che itaami che bo imanda eng’ menotet, Eng’ kachaunetab ge ak sasisiet.
19
Ee, o ne tia mieindang’ung’, ne kiigonorji ichek che iywein! Ne kiiyachi ichek che imang’un eng’ taitab werikab bik!
20
Iung’e ichek ole imi ole ung’at si maityi chaamsetab bik: Iunye ichek eng’ ung’ot eng’ emait si manyor bolatet ne bo ng’alek.
21
Iberurot Jehovah: Amu kigoborua chamnyennyi ne tala ne kikwong’e eng’ nganaset ne kim.
22
Ago kiamwa eng’ sartaet ale, Kigeistaa, ma igeera: Ago kiigas somutikyuk ye kiarirjin.
23
Ee, ocham Jehovah, okwek bikyik tugul che tililen: Ribei Jehovah che iyani, Ak yaakyin eng’ chang’indo ne boisie menotet.
24
Ogimegitu, ak ingonyiganitu mugulelwekwok, Okwek tugul che ogeni Jehovah.
Kalenjin Bible 2020
God's word open for all Bible Society of Kenya, 2020