|
| 1 |
|
| Bä rɔ lua̱k ji̱ lö Kuoth Nhial, cu ɣä jak kä po̱c, kän ɣä kɛ ɣöö ɛ ji̱n gua̱n cuŋni! |
|
| 2 |
|
| Gäŋni ji̱thdu ɣä, kä kän ɣä kɛ pɛ̈th! Jak ni rɔ kä päm lua̱kdä, jak ni rɔ kä ko̱t mi gaŋ ɣä! |
|
| 3 |
|
| Ɛ ji̱n pämdä kä gääŋdä, kä kɛ kui̱ cio̱tädu bo̱th ɣä, |
|
| 4 |
|
| kä lony ɣä kä cambak in dɛ̈pkɛ ni ɣä, kɛ ɣöö ɛ ji̱n gääŋdä. |
|
| 5 |
|
| Cä tëkdä la̱th tetniku, kän ɣä lö Kuoth Nhial, Kuoth in thuɔ̱k. |
|
| 6 |
|
| Ɣän lökä nɛy tin palkɛ kuth baaŋ, duundɛ ɣöö ŋa̱a̱thä ni Kuoth Nhial. |
|
| 7 |
|
| Bi lɔcdä tɛ̈ɛ̈th rɛy nho̱kädu min thil pek, kɛ ɣöö ci cuɔ̱cdä nɛn kä ŋäci rikä, |
|
| 8 |
|
| kä /keni ɣä ka̱m ji̱ tɛ̈r, ci la̱th ni ɣä guäth känä. |
|
| 9 |
|
| A lɔcdu kɔ̱c kɛ ɣä lö Kuoth Nhial, kɛ ɣöö ɣän ta̱a̱ rikä, ci wäŋkä bɛ̈c kɛ wiee, kä ci puɔ̱nydä kɛnɛ ti̱eydä cuuc. |
|
| 10 |
|
| Ci ni̱n teekädä thuɔ̱k ni cucä, kä ci run teekädä thuɔ̱k kɛ lul, ci buɔ̱mdä thuuk kɛ ɣöö ta̱a̱kɛ rik, a ci cɔ̱wkä kɔ̱a̱c ɛ they. |
|
| 11 |
|
| A ci ɣän cua̱ cäät kä ji̱ tɛ̈rä diaal, kä ɛ ɣän mi jiääk kä ji̱ thieekädä, kä dual mäthnikä kɛ ɣä, kä bar nɛy tin ro̱m kɛ ɣä duɔ̱pni rɔ̱ kɛ ɣä. |
|
| 12 |
|
| Ca ɣä cu pa̱l ruëëc ce̱tkɛ ram mi ci li̱w, cä cu ce̱tnikɛ dhaar mi ci tiath. |
|
| 13 |
|
| Kä ɣän liɛŋä ruac nɛɛni ti nyin ŋuan, ci rik ɣä go̱l kui̱cni diaal! Lät kɛn ni ca̱a̱p ti jiäk kɛ kui̱dä, go̱o̱r kɛn ni ɣöö ba ɣä näk. |
|
| 14 |
|
| Kä ɣän ŋa̱a̱thä ni ji̱, lö Kuoth Nhial, kä cä wee i̱, “Ɛ ji̱n Kuothdä.” |
|
| 15 |
|
| Kä tëkdä tëë tetkädu, kän ɣä tetni ji̱ tɛ̈rä kɛnɛ nɛy tin juɔckɛ ɣä! |
|
| 16 |
|
| Nyuthni ja̱ŋdu gɔɔydu, kän ɣä kɛ nhökdu min thil pek! |
|
| 17 |
|
| /Cu ɣä jak kä po̱c, lö Kuoth Nhial, kɛ ɣöö ɣän cɔalä ni ji̱, a po̱c ni ji̱ nyuɔɔni akɛ wä ni jɔɔkni bitdä. |
|
| 18 |
|
| A lëëp ka̱a̱cnikiɛn bit, tin la ruac ɛ liakɛ rɔ̱ kɛ nɛy tin tekɛ cuŋ. |
|
| 19 |
|
| Kä ku gɔyku lɛ ŋuan i̱di tin ci lät kä nɛy tin luɔ̱thkɛ ji̱, tin ci la̱t ni nhiam nath kɛ kui̱ nɛɛni tin lua̱kɛ rɔ̱ ji̱! |
|
| 20 |
|
| Kä la kɛ a kumi kɛ ta̱a̱du kɛɛl kɛ kɛ kä ca̱a̱p nath ti jiäk, guäth cieŋädu gaŋikɛ kä rieet ti jiäk. |
|
| 21 |
|
| A liak tekɛ Kuoth Nhial, kɛ ɣöö cɛ ɣä nyuɔ̱th nhökdɛ min gääy naath kä thil pek mëë ca ɣä göl wi̱c. |
|
| 22 |
|
| Kä cua̱ ruac kɛ jɔw mi di̱i̱t i̱, “Ca ɣä ŋuɔk jɔ̱ɔ̱r nhiamdu.” Duundɛ ɣöö ci ruacdä liŋ, mëë cä ji̱ thiec kɛ luäk. |
|
| 23 |
|
| Nhɔakɛ Kuoth Nhial, yɛn nɛɛkɛ diaal! La päl Kuoth Nhial ji̱ ŋäthä ikä kä bɛ nɛy tin la̱a̱t jiäkni culikä. |
|
| 24 |
|
| Cuɔmɛ rɔ̱, kä a lo̱ckun bum, yɛn nɛy diaal tin ŋa̱thkɛ ni Kuoth Nhial! |
|
|
|
|