×

Ika Bible 2018

Ẹbụ-ọma 34

1
M k'a kpanmịn Osolobuẹ ogẹn ile; ọnụ m ajabehikọ a mma.
2
Umẹ-ndụn m k'e gi Osolobuẹ a nyan isi; ndị wẹ rị a bịangbu wẹ nụ a ghọghọma.
3
Sọn ni m ja Osolobuẹ mma; nị ẹnyi bushi ni ẹfan a elu.
4
M kpọku Osolobuẹ, ọ za m — ọ gbapụha m imẹ ihiẹn ile te rị a tụ m egun.
5
Ndị bu ẹnya zinmẹ i k'a rị e gbuke, ifẹnrẹn emẹkọ wẹ.
6
Ogbẹnnyẹni a hịghọ, Osolobuẹ nọ za a; ọ zụọpụha a imẹ nsọngbu ẹ ile.
7
Mmọn-ozi Osolobuẹ e fihunmẹ ndị hụn a tụ egun Osolobuẹ; ọ gbapụha wẹ a gbapụha.
8
Danmịndẹle, n'ị hụn a nị Osolobuẹ a rịka mma; onyẹ hụn gbaburun'ẹ e nwọnkẹ ngọzi.
9
Tụ nị egun Osolobuẹ, ụnụ ndị nsọ a, makẹni onwọnni ihiẹn a kọ ndị hụn a tụ egun ẹ.
10
Ihiẹn a kọghọdẹ ikoro-ẹwọrọ, ẹgụn a gụnghọ wẹ, kanị onwọnni ihiẹn rị mma a kọ ndị e fe Osolobuẹ.
11
Bịa nị, ụmụ m, gọnni m ntịn; m k'a kuzi ụnụ kẹ w'a tụ egun Osolobuẹ.
12
Onyẹ ọwụlẹ ndụn a sụọ imẹ ụnụ, onyẹ hụn chọ ụtọmị lẹ ihiẹn rị mma,
13
ya wepụ eje-oku ire ẹ, ya wepụ ntụ ụgb'ọnụ a.
14
Ya gbakịtọ eje-ihiẹn azụụn, mẹmẹ ihiẹn rị mma a chọ udọn, a chụsọn ẹ.
15
Ẹnya Osolobuẹ rị ebe ndị ezi-omumẹ rị, ntịn a rị ẹkwan wẹ;
16
kanị o bu a nụmanị ndị e mẹ eje-ihiẹn, kẹn'o fichanpụ ẹfan wẹ enu-ụwa.
17
Ndị ezi-omumẹ yi oro, Osolobuẹ a nụ ukwere wẹ, ọ gbapụha wẹ imẹ nsọngbu wẹ ile.
18
Osolobuẹ a nọkunmẹ ndị ndụn gụ, a zụọpụha ndị obi rị a gbawapụ.
19
Onyẹ ezi-omumẹ nwọn ikẹn nwọn nsọngbu bu ọda, kanị Osolobuẹ a zụọpụhachanrịn a imẹ wẹ ile;
20
o chedọnchanrịn ọkpụkpụ hụnyẹ ile, onwọnni akpụ ohu a kpagini.
21
Eje-ihiẹn k'e gbu ndị-njọ; ikpe k'a ma ndị-iṅẹnrẹn ndị ezi-omumẹ.
22
Osolobuẹ a gbapụha idibo ẹ; onwọnni onyẹ gbaburun'ẹ ikpe k'a ma.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes