1
Bunụmanị wẹ, Osolobuẹ, dodo bunụmanị ndị bunụmanị m; lụsọn ndị rị a lụsọnni m!
2
Weri akpaịn nta lẹ akpaịn uku; lihi, n'i d'e yeni m ẹka.
3
Sepụha obo ọnụ-nkọn lẹ obo ọnụ suẹn-suẹn-suẹn, gi nụmanị ndị rị a chụnị m. Dodo kasị m obi — sị m, “M k'a zụọpụha ị.”
4
Ndị hụn chọ nị wẹ gbu m, wẹ fa, ifẹnrẹn ya mẹ wẹ; ndị rị e zu umẹ ni wẹ tikpọ m, wẹ gi ifẹnrẹn la.
5
Mẹ wẹ rị kẹ ẹfịfịa ufere bukọ, hụn mmọn-ozi Osolobuẹ gi nupụkọ wẹ;
6
ụzọ ya gba wẹ ishi ẹnya, e kpori wẹ, hụn mmọn-ozi Osolobuẹ gi chụkọ wẹ.
7
Ebe wẹ shimẹni m ọnyan bụ onwọnni ihiẹn m mẹ, gutọnị m mgbugbu bụ onwọnni ihiẹn m mẹ.
8
Ntikpọ ya kunrun wẹ idẹnmizi, ọnyan-ọga wẹ shitọ ya kụ wẹ nwụndọn wẹ; wẹ dan a, la iwi.
9
Ogẹn ahụn, umẹ-ndụn m e gi ufiri Osolobuẹ ghọghọma, ẹfọ a sụọma m ụsụọ makẹ nzụọpụha ọ zụọpụha m.
10
Ihiẹn ile rị imẹ m jẹnkọ d'e yi, “Onyẹ nọ kẹ yụ wụ Osolobuẹ?! Y'a gbapụha ndị wẹ rị a bịangbu ẹka ndị rị a bịangbuni wẹ, a zụọpụha ndị wẹ rị e mẹgbu lẹ ndị wẹ rị e sọngbu ẹka ndị rị e mẹgbuni wẹ.”
11
Ndị ọshẹri ẹfọ jọ a pụha; wẹ rị a jụ m ihiẹn m marịnlẹni.
12
Wẹ gi njọ a kụ m mma, e gbu mmọn m.
13
Kanị, kẹ emu rị a kụ wẹ, m yiri ẹkwa-achọ onyẹ ihiẹn mẹ, gi ibu ọnụ welụa enwẹn m alị. Ogẹn Osolobuẹ gilẹni za m ekpere m mẹni wẹ,
14
ẹhụ ekezini m ọkụn, a nọ m kẹ sị ọwụ m mọbụ nwẹnẹ m rọ. M hụ e bu ihun a kọma alị, a kwan, nọkẹ sị m rị a kwan nnẹ m.
15
Kanị mmẹ nwẹn a kpọgburu, ọ sụọ wẹ, e zu wẹ; m gini d'a marịn, ndị ẹti e fihunmẹ m, a dọkịka m ikẹn-ikẹn.
16
Wẹ hụ e gi ọnụ e mẹ m ihiẹn, e rọn m egun nọkẹ ndị ghalẹni a tụ egun Osolobuẹ;
17
Euu Osolobuẹ, elee mgbe k'i k'e lebehi ilee mmaka? Dodo, gbapụha ndụn m wẹ chọ nị wẹ tikpọ; zụọpụha ndụn m ẹka ẹwọrọ ndịnị.
18
M k'a nọ igunrun ndị nke i kpanmịn ị; m k'a nọ imẹ igunrun hi ogbe ja ị mma.
19
Anịkwọlẹ ndịnị mụ m ẹmụ, ndịnị rị e we iwe m bụ onwọnni ihiẹn m mẹ wẹ; anịlẹ ndịnị ize m rị e ze kanị onwọnni ihiẹn m mẹ wẹ gi iwe m rị e weni wẹ gbumẹ ibe wẹ ikpu-ẹnya.
20
W'a ra ku oku udọn, w'e buokin ndị nọdị nke wẹ imẹ alịnị ọnụ.
21
Wẹ hụ a shịapụnị m ọnụ, a sị, “Ẹhẹn! Ẹhẹn! Ẹnyi e gighọ ẹnya ẹnyi hụn k'ị rị e mẹ ẹ!”
22
Euu Osolobuẹ, y'a hụngụọ a; agbakwọlẹ nkịtịn. Onyẹ-nwọnni-ẹnyi, dodo, anọtelẹ ebe m rị.
23
Tẹnhin n'i d'e kinni m ọnụ m! D'a dọnị m okuni, Chuku m, Onyẹ-nwọnni-m!!
24
Osolobuẹ hụn wụ Chuku m, dodo ghọsị wẹ nị ẹka m rị ọchan, makẹni ị wụ onyẹ ezi-omumẹ; anịlẹ wẹ mụ m ẹmụ.
25
Anịlẹ wẹ sị enwẹn wẹ, “Ẹhẹn, ihiẹn ẹnyi chọ e mẹgụọ!” mọbụ, “Ẹnyi e luepụgụọ a.”
26
Ndị ile gi nsọngbu m a mụ m ẹmụ ifẹnrẹn ya mẹ wẹ; w'a marịnzịlẹ hụn w'e mẹ. Ndị ile rị a nyannị m isi, wẹ jeri ụya lẹ ịfa kẹ ẹkwa.
27
Kanị, oro ịghọghọ lẹ anwịnrịn ya wụrụ nke ndị rị a chọ nị wẹ nụ nị ẹka m rị ọchan; wẹ hụnsọnmẹ ihiẹn wẹ e gi sị, “Ọghọ ya rịnị Osolobuẹ, hụn a chọ n'ọ rịnị odibo ẹ mma.”
28
Ogẹn ahụn, ire m k'a rị e ku oku ezi-omumẹ i, a ja ị mma kẹ ụhụọhịn han.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc