×

Umbundu Bíblia Sagrada 1963

OLOSAMO 35

1
Tamalala, a Yehova, lava va tamalala lame. Yaka lava va njakisa.
2
Yelula ociyepelo lotevele. Nundile olunda.
3
Somola onjelia lunga. Sitika onjila yava va ndupuisa. Sapuila utima wange, huti, Ame ndupopeli wove.
4
Ava va sanda omuenyo wange va kutiwe osõi, va mole etombo. Lava va numbila ehãla lĩvi va konduiwe, va sakalale.
5
Va linge ndovisaikiti vi enda lofela, osimbu ungelo wa Yehova a va lupuisa.
6
Onjila yavo yi tekave, yi sielene, osimbu ungelo wa Yehova o va lupuisa.
7
Momo va nela owanda olivova. Olivova va fẽlẽla omuenyo wange okueve.
8
Okunyõleha ku va sange uyombeki. Owanda va ta u va kuate ovo muẽle, va fe ovo muẽle vokunyõleha kuaco.
9
Oco utima wange u sanjukila Yehova, kuenje u yolela eyovo liaye.
10
Akepa ange osi a popia vati, A Yehova, wa soka love helie? Ove o silamela ohukui ku wo velapo, haive o popela ohukui losuke ku-u u punda.
11
Olombangi viemande vi votoka, vi mula ovina sia kũlĩhile.
12
Mueci ciwa va nyihilamo cĩvi. Va sumuisa utima wange.
13
Ame puãi, eci ovo va vela, nda wala ocikelei. Nda liketisa loku likandangiya okulia. Nda petamisa utue kuenje nda va likutilila,
14
hutiño nda sumuila umue ekamba liange pamue manjange. Nda petama loku lila ndu o lila inaye.
15
Ovo puãi va yolela okulikonjoka kuange, vongolokela pamosi. Ovisokui via limungikila kuenje sia ci kũlĩhile. Ka va liwekele oku sokola.
16
Va njola njola ño-o loku sewula. Va linakilila ovayo.
17
A Yehova, toke pi o vanja ño? Mopele kungangala wavo. Popela omuenyo wange kolohosi.
18
Oco hu pandula vekongelo linene, hu sivayaila pokati kowiñi womanu.
19
Ku ka tave okuti ava va nyale olivova va nambela. Ndaño ava va suvuka ocali oku ñupila kiso.
20
Momo ka va popi lombembua, puãi, ava va livala vofeka, va va tumbila ehãla liolondaka vielimbi.
21
Va ngasamela olomela. Va linga vati, Ocuoco, ocuoco, ovaso etu a ci mola.
22
Ove wa ci mola, a Yehova. Ku kohe. A Yehova, ku ka ñaile ocipala.
23
Nyañumuha, limbuka esunga lia mosokela, leli lia posokela ondaka yange, a Suku yange, a Ñala yange.
24
Netele onimbu yoku njovuisa, a Yehova Suku yange. Ka va ka nambele.
25
Ka va ka popie vitima viavo, vati, Ocuoco tua yonguile. Ka va ka popie, vati, Tuo wina.
26
Ava va yolela ohali yange va kutiwe osõi, va sakalale. Ava va limandiyila va paleke osõi letombo.
27
Ava va livela nda njovoka volule loku yolela. Oloneke viosi va popie popie vati, Yehova a pandiyiwe. Eye o sanjukila esumũlũho liukueuje waye.
28
Oco elimi liange li vangola esunga liove lesivayo liove eteke liosi.
Umbundu Bible 1963
Umbundu Bible United Bible Societies, 1963
:
Save Notes