×

Ika Bible 2018

Ẹbụ-ọma 36

1
O nwọn ihiẹn Chuku rị a gwa m imẹ obi: nị onyẹ-njọ jọ njọ ru alị, egun Chuku arị a ẹnya.
2
Makẹni ọ rịka mma ẹnya a, ara hụn njọ a hụn o gi ze ẹ ize.
3
Eje-oku lẹ ntụ jun ẹ ọnụ; ọ marịnzị ihiẹn rị mma; a ra mẹzi ihiẹn rị mma.
4
O dinẹ elu-ukpo, ọ mama eje-ihiẹn o k'e mẹ; o kweri n'o k'e mẹ ẹ — ọ jụkọ eje-ihiẹn hụ.
5
Euu Osolobuẹ, ihiẹn-ọsụsụọ ị e jẹnhanghọ elu kẹ igwere; kẹ orukpu dọn jẹn elu ọda-ọda, ẹrịra kị dọn wụ Onyẹ wẹ gi e dọn ẹnya ọda-ọda.
6
Ezi-omumẹ i turu ọhụnma-ọhụnma kẹ okẹn-ugu ile, eṅẹn i e mikẹ — ọ nọkẹ okẹn-ohimin. Euu Osolobuẹ, ịyụ e dọnmẹ kẹ ịhịan kẹ anụ ndụn.
7
Ihiẹn-ọsụsụọ ị enwọn ihiẹn wẹ e gi jen'ẹ! Kẹ ndị uku kẹ ndị-nta a gbaban igungun nku i.
8
Ihiẹn jun imẹ ụlọ ị kẹ wẹ ile e ri; y'e ye wẹ mirin iyi i a sụọnị a ra.
9
Makẹni ịyụ gi isi-mirin e ye ndụn; ukpẹ i kẹ ẹnyi gi e legha ụzọ.
10
Nwọnsọnmẹ ihiẹn-ọsụsụọ ndị marịnn'ị, y'e gisọnmẹ ezi-omumẹ i e sọn ndị obi wẹ zin.
11
Ụkụ ndị mpache y'e rukwọlẹ m ẹhụ; ẹka ndị-njọ y'a chụpụkwọlẹ m.
12
Ledẹ kẹ ndị-ejẹ dan, fiẹnrin mọmọmọ ebẹhụ! A kụtugụọ wẹ wẹ, olihi anịzịnị wẹ lihi!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes