×

Maayong Balita 2012

SALMO 36

1
Ang sala nagadikta sa tagipusoon sang malaut nga tawo, ginasikway niya ang Dios, kag wala sia nagakahadlok sa iya.
2
Tungod kay mataas gid ang pagkabig niya sang iya kaugalingon, nagahunahuna sia nga ang Dios indi makahibalo sang iya sala kag indi magsilot sa iya tungod sini.
3
Ang iya ginahambal malaut kag puno sang kabutigan, indi na sia makahibalo sa paghimo sing maayo.
4
Nagaplano sia sing malaut bisan sa iya higdaan, indi maayo ang iya pagginawi, kag wala niya ginasikway ang malaut.
5
Ang imo mapinadayunon nga gugma, O Ginoo, nagalambot sa kalangitan, ang imo pagkamatutom tubtob sa kahawaan.
6
Ang imo pagkamatarong malig-on kaangay sang matag-as nga mga bukid, ang imo mga paghukom kaangay sang kadadalman sang dagat. Ikaw, O Ginoo, nagatatap sa mga tawo kag mga sapat.
7
Daw ano ka malahalon, O Dios, ang imo mapinadayunon nga gugma! Makapanago kami sa landong sang imo mga pakpak.
8
Nagapaayaw-ayaw kami sang bugana nga pagkaon sa imo balay, ginapainom mo kami sa suba sang imo kaayo.
9
Ikaw ang ginahalinan sang tanan nga kabuhi, kag tungod sang imo kapawa makakita kami sing kapawa.
10
Padayuna man ang paghigugma mo sa mga nakakilala sa imo, kag ang paghimo sang maayo sa mga matarong.
11
Indi pagtugoti nga salakayon ako sang bugalon nga mga tawo, ukon lagson ako sang mga malaut nga mga tawo!
12
Tan-awa kon diin napukan ang malaut nga mga tawo! Didto sila nagahamyang nga indi na makabangon.
Ilonggo Bible 2012
Maayong Balita nga Biblia Philippine Bible Society, 2012
:
Save Notes