×

Buku Lopatulika 1992

MASALIMO 38

1
Yehova, musandidzudzule ndi mkwiyo wanu: Ndipo musandilange moopsa m'mtima mwanu.
2
Pakuti mibvi yanu yandilowa, Ndi dzanja lanu landigwera.
3
Mumnofu mwanga mulibe camoyo cifukwa ca ukali wanu; Ndipo m'mafupa anga simuzizira, cifukwa ca colakwa canga.
4
Pakuti mphulupulu zanga zapitirira pamutu panga: Ndathodwa nazo monga ndi katundu wolemera.
5
Mabala anga anunkha, adaola, Cifukwa ca kupusa kwanga.
6
Ndapindika, ndawerama kwakukuru; Ndimayenda woliralira tsiku lonse.
7
Pakuti m'cuuno mwanga mutentha kwambiri; Palibe pamoyo m'mnofu mwanga,
8
Ndafoka ine, ndipo ndacinjizidwa: Ndabangula cifukwa ca kumyuka mtima wanga.
9
Ambuye, cikhumbo canga conse ciri pamaso panu; Ndipo kubuula kwanga sikubisika kwa Inu.
10
Mtima wanga ugundagunda, mphamvu yanga yacoka: Ndipo kuunika kwa maso anga, ndi iko komwe kwandicokera.
11
Ondikonda ndi anzanga apewa mliri wanga; Ndipo anansi anga aima patali.
12
Ndipo andichera misampha iwo akufuna moyo wanga; Ndipo iwo akuyesa kundicitira coipa alankhula zoononga, Nalingirira zonyenga tsiku lonse.
13
Koma ine, monga gonthi, sindimva; Ndipo monga munthu wosalankhula, sinditsegula pakamwa panga.
14
Inde ndikunga munthu wosamva, Ndipo m'kamwa mwanga mulibe makani.
15
Pakuti ndikuyembekezani Inu, Yehova; Inu mudzayankha, Ambuye Mulungu wanga.
16
Pakuti ndinati, Asakondwerere ine: Pakuterereka phazi langa, asadzikuze pa ine.
17
Ndafikana potsimphina; Ndipo cisoni canga ciri pamaso panga cikhalire.
18
Pakuti ndidzafotokozera mphulupulu yanga; Nditenga nkhawa cifukwa ca chimo langa.
19
Koma adani anga ali ndi moyo, nakhalandi mphamvu: Ndipo akundida kopanda cifukwa acuruka.
20
Ndipo iwo akubwezera coipa pa cabwino Atsutsana nane, popeza nditsata cabwino.
21
Musanditaye, Yehova: Mulungu wanga, musakhale kutali ndi ine.
22
Fulumirani kundithandiza, Ambuye, cipulumutso canga.
Chewa Bible 1992
Zambia Bible Society, Malawi Bible Society and Zimbabwe Bible Society
:
Sungani Zolemba