×

WẼNNAAM SEBRE 2014

Yɩɩla 38

1
A Davɩɩd yɩɩlle, tẽegr yĩnga.
2
Sẽn-Ka-Saabo, ra-y sɩbg-y maam y sũ-yikrã pʋg ye. La y ra leng maam y sũ-puugrã pʋgẽ ye!
3
Bala, yãmb pɛɛmã yõga maam. Yãmb nugã wẽe maam.
4
Yãmb sũ-puugrã kɩtame tɩ mam yĩngã zãng tar toogo. Mam beegrã yĩnga, mam kõabã ka leb n tar laafɩ ye.
5
Bala, mam yel-wẽnã zãntlem yɩɩda m zugã woglem, la a lebga zɩɩbo, n zɩsg maam hal wʋsgo.
6
Mam noadã põogame tɩ yũugã yita, la yaa mam yalemdã yĩnga.
7
Mam gõdame n zĩ ne sũ-sãan-kãsenga. Daar fãa, mam bee sũ-sãang pʋga, wa m ned n ki.
8
Bala, mam pʋgã fãa wɩnga basɩ, tɩ mam yĩngã fãa tar toogo.
9
Mam ka leb n tar pãng ye. Mam gĩinã fãa maaga zãnga. Mam sũ-sãangã kɩtame tɩ m sidgdẽ.
10
Zu-soaba, yãmb mii mam datmã fãa, la mam sidgrã ka solg ne yãmb ye.
11
Mam sũurã kiuusdame, tɩ m pãngã sɛtẽ. Mam ninã pãng boogdame.
12
Mam noadã yĩnga, m zo-rãmbã ne m tũud-n-taasã tard n lebda kɛɛnga. Mam doagdbã zãagda b mens ne maam.
13
Sẽn dat-b n sãam mam vɩɩmã bẽta maam. Sẽn dat-b maam ne wẽngã gomda maam n kãnegd maam la b gomd zãmb goam ne maam daar fãa.
14
La mam lebga wa wʋnga, n ka leb n wʋmdẽ ye. Mam lebga wa muka, n ka leb n gomd ye.
15
Mam lebga wa ned sẽn ka wʋmde, n ka tar m sẽn na n leok ye.
16
Sẽn-Ka-Saabo, yaa yãmb la m geta, Mam Zu-soab a Wẽnnaam, yaa yãmb n na n leok n kõ-ma.
17
Bala, mam kosa yãmb n yeel yaa: «Ra bas-y tɩ b maan sũ-noog mam wɛɛngẽ ye. Ra bas-y tɩ b wuk b mens m naoorã sẽn wat n lakã ye.»
18
Bala, mam dat n lʋɩɩme, la toog tar-m-la daar fãa.
19
Bala, mam vẽneg n togsa m kongrã, mam sũur sãama m yel-wẽnã yĩnga.
20
Mam bɛɛbã fĩisda ne pãnga. Sẽn kis-b maam zaalmã sõor yaa wʋsgo.
21
Neb nins mam sẽn maan-b neer tɩ b lebsd maam wẽngã zabda ne maam, mam sẽn baood n maan-neer yĩnga.
22
Sẽn-Ka-Saabo, ra bas-y maam ye! Mam Wẽnnaam, da zãag-y y meng ne maam ye!
23
Wa-y tao-tao n wa sõng-ma, Zu-soaba, yãmb la mam fãagda!
Mossi MPBU 2014
Moore Bible Bible Society of Burkina Faso, 2014
:
Save Notes