×

Maayong Balita 2012

SALMO 41

1
Malipayon ang tawo nga nagakabalaka sa mga imol, ang Ginoo magabulig sa iya kon yara sia sa kalalat-an.
2
Ang Ginoo magaapin sa iya kag magatipig sang iya kabuhi, pagalipayon niya sia sa duta, indi niya sia pag-itugyan sa kamot sang iya mga kaaway.
3
Kon sia magmasakit, ang Ginoo magabulig sa iya, kag ayuhon niya sia.
4
Nagsiling ako, “Nakasala ako batok sa imo, O Ginoo, kaluoyi kag ayuha man ako!”
5
Ginapakamalaut ako sang akon mga kaaway. Nagasiling sila, “San-o pa bala sia mapatay kag malimtan?”
6
Indi maayo ang tuyo sang mga nagabisita sa akon, nagatipon sila sang malain nga balita nahanungod sa akon, kag dayon nagalakat sila kag nagapanugid sini sa bisan diin.
7
Ang mga nagadumot sa akon nagahutikay nahanungod sa akon, kag nagahunahuna sila sing malain nahanungod sa akon.
8
Nagasiling sila, “Malubha ang iya masakit, kag indi na gid ina sia mag-ayo.”
9
Bisan ang akon suod nga abyan, ang akon gid ginasaligan, nga nagsalo sa akon pagkaon, nagkontra sa akon.
10
Kaluoyi man ako, O Ginoo, kag ayuha ako, kag magabalos ako sa akon mga kaaway!
11
Nahibal-an ko nga ikaw nahamuot gid sa akon, kay indi sila makadaog sa akon.
12
Ginabuligan mo ako, tungod kay nagahimo ako sing matarong, indi mo ako pagpahalinon sa imo atubang sa gihapon.
13
Dayawon ang Ginoo, ang Dios sang Israel! Dayawon sia karon kag sa walay katubtoban! Kabay pa! Kabay pa!
Ilonggo Bible 2012
Maayong Balita nga Biblia Philippine Bible Society, 2012
:
Save Notes