×

Ika Bible 2018

Ẹbụ-ọma 44

1
Chuku, ẹnyi e gigụọ ntịn nụ a; ndị nẹdi ẹnyi wẹ a gwagụọ ẹnyi ihiẹn i mẹ ogẹn wẹ mbụ-mbụ:
2
kẹ ị dọn gi ẹka ị chụpụ ndị alị ichẹn-ichẹn, gbọ wẹ nwẹn ye; k'i dọn mẹshi alị ndị ahụn ikẹn, mẹ n'ọ rịnị Izrẹlụ mma.
3
Ẹlẹkwọ ọpịa-agha wẹ kẹ ndị nke i gi weri alị ahụn; ẹlẹ ikẹn wẹ kẹ wẹ gi mẹri! Ikẹn i lẹ akwanran ị lẹ ẹnya rị mma i gi e lee wẹ haịn, makẹni ị chọ nị i mẹni wẹ ọhụnma.
4
Ịyụ wụ Eze m, Chuku hụn e ye ebọn Jekọpụ wụ Izrẹlụ mmẹri.
5
Ịyụ haịn ẹnyi gi e mẹri ndị-iṅẹnrẹn ẹnyi; ẹfan ị kẹ ẹnyi gi a zọgbu ndị bunụmanị ẹnyi.
6
M'a ra gi ụta m dọn ẹnya; ẹlẹ ọpịa-agha m a zụọpụha m.
7
Ịyụ a zụọpụha ẹnyi ẹka ndị-iṅẹnrẹn ẹnyi, e gbe ifẹnrẹn e ye ndị iwe ẹnyi rị e we ihun.
8
Chuku kẹ ẹnyi gi a nyan isi ụhụọhịn ile, ẹnyi k'a gha a ja ị mma jẹnrin ejẹn.
9
Kanị, y'a jụgụọ ẹnyi nwan, y'e gbegụọ ifẹnrẹn ye ẹnyi ihun; y'e sọnjẹnzini ndị-agha ẹnyi agha.
10
Y'e mẹgụọ ẹnyi gbanị ndị-iṅẹnrẹn ẹnyi ọsọ, ndị iwe ẹnyi rị e we a kịrị ihiẹn ẹnyi.
11
Y'e wegụọ ẹnyi ye wẹ e gbu kẹ atụnrụn, y'e feyịyagụọ ẹnyi ye alị ndị ọzọ.
12
Y'e repụgụọ ndị nke i nru-ọnụ lekẹ ihiẹn afịa jụ.
13
Y'e mẹgụọ ẹnyi wụrụ ihiẹn ẹmụ ihun ndị nọkunmẹni ẹnyi; y'e mẹgụọ ẹnyi wụrụ ihiẹn w'a mụ ẹmụ ẹnya ndị nọhunmẹni ẹnyi.
14
Y'e mẹgụọ ẹnyi wụrụ ihiẹn wẹ gi a kpọ iyi ẹnya alị ndị ọzọ — wẹ hụ a mụ ẹnyi, e finfin isi.
15
Ifẹnrẹn hụ e mẹ m ụhụọhịn ile; ifẹnrẹn e kpumẹgụọ m ihun,
16
makẹ ọnụ ndị rị a mụ ẹnyi ẹmụ lẹ ndị rị a kparini ẹnyi; makẹ eṅẹnrẹn, hụn rị a chọ n'o mẹgwarị.
17
Ihiẹn ndịnị ile rị e mẹ ẹnyi — ọsụọn'a nị ẹnyi e febehini i, ẹnyi egini ntụ sọn Iwu i.
18
Obi ẹnyi apụnị ebe ị rị, ẹnyi aghanị ụzọ ị pụ.
19
Y'e titugụọ ẹnyi, la ẹnyi tọ ebe eje-anụ wụ jakalụ jun; y'e gigụọ ẹkpa-ishi lẹ ụya kpumẹ ẹnyi.
20
Omẹni ẹnyi te latọ Chuku ẹnyi, shịapụ ẹka ẹnyi zinmẹni mmọn —
21
Chuku amarịnkọ? O k'a marịn nụ, makẹni ọ marịnghọ obi ẹnyi, ọsụọn'a nị obi ẹnyi zueri ezueri!
22
Ufiri i kẹ wẹ gi nwan e gbu ẹnyi kẹ ụhụọhịn han, e mẹ ẹnyi kẹ atụnrụn wẹ k'e gbu.
23
Tẹnhin nwan, Osolobuẹ! K'ị rị nwan a ranhịnnị?! Dodo, tẹnhin! Ajụlẹ ẹnyi jụchanrịn!
24
K'ị rị e bupụnị ẹnyi ihun? Kị haịn i gi zọ afụnfụn ẹnyi rị a ta lẹ nsọngbu ẹnyi rị imẹ ẹ?!
25
Ẹnyi a danrugụọ alị, fiẹnrin mọmọmọ.
26
Lihi nwan d'e yeni ẹnyi ẹka! Gi ufiri ihiẹn-ọsụsụọ ị gbapụha ẹnyi!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes