×

Ika Bible 2018

Ẹbụ-ọma 45

1
Obi rị a sụọ m ụsụọ, yeni ihiẹn rị mma m chọ nị m ku. Eze kẹ m rị a gwa; ire m wụ ukeke (pẹni) akanwe marịn ọrụn!
2
Ịyụ kachanrịn ikẹnnyẹ ile okorọbịa e pu! Oku ọnụ ị a rịka mma — ya wụnị Chuku a gọzigụọ ị jẹnrin ejẹn!
3
Kẹnmẹ ọpịa-agha ị ye ukun, odogun-agha hụn ikpẹn lẹ ọghọ jun ẹhụ!
4
Gi ọghọ-nze lẹ anyịnyan ị jẹnmẹ d'e mẹrisọnmẹ; d'a kwadọn ezioku lẹ iwelụa-enwẹn alị lẹ ezi-omumẹ; ẹka-nni i ya kpasọnmẹn'i ikẹn!
5
Ọbara ụta ị tụ nkọ e zupusọnmẹ ndị iṅẹnrẹn i akpobi; i k'a gbatu ndị alị ichẹn-ichẹn.
6
Chuku, ukpo i k'a rị jẹnrin ejẹn; ọkpọ ọkịkị kụrụ ọtọ k'i gi a kị alị-eze i;
7
ihiẹn furuni a sụọ ị ụsụọ; eje-ihiẹn e ze i ize. Ịya haịn Chuku hụn wụ Chuku i gi tumẹ i, hu udẹn ịghọghọ ye i isi karị ibe i.
8
Ẹwuru i ile hụ e kun fuẹin yeni maa lẹ alo lẹ kashịa junni wẹ; ndị egu i hụ a kpọn'ị ụbọ imẹ obi-eze wẹ gi ihiẹn eze-enyi chọ mma.
9
Ụmụ-ikpoho ndị-nze rịdẹ imẹ ikpoho ndị rị e sọnhunmẹn'i; alasị turu ẹka-nni i, o yihụ ezigbo goru alị Ofiri.
10
Okpoho wẹ rị a lụ, gọn ntịn; lee ẹnya, gọn ntịn: la ndị nke i lẹ ikpụlọ nẹdi i tọ,
11
kẹni mma ị hụn ụzọ a sụọ eze; ebe omẹni ịya wụ di-nwọnn'i — humẹn'ẹ isi.
12
Kẹ ndị alị Taya k'e gi oyiye bịa d'a chann'ị ẹnya, ndị kachanrịn ọdanfịn k'a chann'ị ẹnya.
13
Lee kẹ nwa eze ahụn eze rị a lụ mahan mma — ebẹhụ ọ rị imẹ ihiẹn wẹ gi bula a! Goru-goru kẹ wẹ gi kpa ẹwuru ẹ.
14
Ẹwuru wẹ kpayesọnmẹ ihiẹn k'o yi; wẹ dula a d'e kunrun eze; ịgbagba dukọ a sọnkọ a.
15
Wẹ hụ a ghọghọ, ẹfọ hụ a sụọ wẹ ụsụọ kẹ wẹ dula wẹ; a banhan wẹ obi-eze.
16
Mmụ ị k'e rikin i eze, kẹ i dọn rikin ndị nẹdi i eze; i k'e mẹ wẹ kịgbarị alị ile.
17
M k'e mẹ agbọ ile a nyanhan ị, alị ile a ja ị mma jẹnrin ejẹn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes