×

Ekitabo Erikwera 2008

Zaaburi 46

1
Ruhanga niwe buhungiro bwaitu kandi amaani gaitu, otuura ayeteekateekire kutuhwera tushobeirwe.
2
N'ahabw'ekyo, nobu ensi erihinduka, enshozi zikatsindama ahagati y'enyanja,
3
n'amaizi gaayo gakahoorera nigatabanguka, n'enshozi zikatengyeetsibwa okwehuura kwayo, tituritiina. (Mukama ow'amahe ari naitwe, Ruhanga wa Yakobo niwe rugo rwaitu!)
4
Hariho omugyera ogu okusheneneka kwagwo kuruhuura orurembo rwa Ruhanga, gukeeza obutuuro bwa Rukiraboona.
5
Ruhanga ari ahagati yaarwo, tiruritengyeetsibwa, Ruhanga aruhwera omushekye nigujuguta.
6
Amahanga ku gajagarara, n'obugabe bwazongorekana, agambisa amaani, ensi eyaga.
7
Mukama ow'amahe ari naitwe, Ruhanga wa Yakobo niwe rugo rwaitu!
8
Nimwije, mureebe emirimo mikuru ya Mukama eby'okutangaaza ebi akora omu nsi!
9
Amaraho engamba omu nsi yoona, amata agahendagura, amacumu agatyabura, n'engabo azootsya.
10
Mucureere, mumanye ku ndi Ruhanga, ohimbisibwa omu mahanga goona n'omu nsi yoona!
11
Mukama ow'amahe ari naitwe, Ruhanga wa Yakobo niwe rugo rwaitu!
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes