×

WẼNNAAM SEBRE 2014

Yɩɩla 51

1
A Davɩɩd yɩɩlle, yɩɩlã naab yĩnga.
2
Yaa wakat ning Wẽnnaam no-rɛɛs a Natã sẽn kẽng a Davɩɩd nengẽ, a Davɩɩd sẽn maan yoob ne a Batseba wã zugẽ.
3
Wẽnnaam, zoe-y mam nimbãaneg wa sẽn zems y nonglmã. Yẽes-y mam kongrã, y nimbãan-zoe-kãsengã yĩnga.
4
Pek-y mam beegrã zãnga, la y yɩlg maam n yiis m yel-wẽnã.
5
Bala, mam sak n deega m kongrã, la mam yel-wẽnã bee m taoor wakat fãa.
6
Mam beega yãmb y yembr bala. Mam maana sẽn yaa wẽng yãmb nifẽ. Dẽ wã, yãmb yaa tɩrg y goamã pʋgẽ. Yãmb bʋʋdã kaoob zemsa zãnga.
7
Ade, mam doga kongrã pʋga. Hal mam sẽn dag n ket m ma pʋgẽ, mam yaa yel-wẽnã soaba.
8
La bũmb ning sẽn noom yãmba, yaa sɩd sẽn be ninsaal sũ-zulungẽ. Kɩt-y tɩ m paam yam m sũ-zulungẽ wã.
9
Yɩlg-y maam ne Izop n yiis m yel-wẽnã tɩ m yɩ yɩlemde. Pek-y maam tɩ m yɩ pɛɛlg n yɩɩg lam-palga.
10
Kɩt-y tɩ m wʋm sũ-noog ne kɩdeng koɛɛga. La kõab nins yãmb sẽn dag n wõrã na n kɩdmame.
11
Wẽnemd-y y neng n da ges mam yel-wẽnã ye. Yẽes-y mam kongrã zãnga.
12
Wẽnnaam, kõ-y maam sũur sẽn yaa yɩlemde, la y palem m yamã t'a zemse.
13
Da rig-y-m tɩ m zãag ne yãmb ye. Da yiis-y y sɩɩgã sẽn welg toorã m pʋgẽ ye.
14
Kɩt-y tɩ m leb n paam sũ-noog ning y fãagrã sẽn kõtã, bɩ y tebl maam ne yam-yãk-sõng sɩɩgã!
15
Mam na n zãmsa wẽn-kɩɩsdbã yãmb soayã, la yel-wẽn-maandbã na n lebg n waa yãmb nengẽ.
16
Mam Wẽnnaam, Wẽnnaam sẽn yaa mam fãagda, fãag-y maam ne zɩɩm daagre! La mam zelemd na n moona yãmb tɩrlmã.
17
Zu-soaba, yaag-y m no-bɩmsã, la m noorã na n pẽga yãmba.
18
Bala, ka maand n noom yãmb ye, sã n ka rẽ, m dag n na n maanẽ-la maoong n kõ-yã. Leb n ka maoong sẽn yõogd bugum me n noom yãmb ye.
19
Maand sẽn noom yãmb a Wẽnnaam, yaa sik-m-meng sẽn be ned sũurẽ. Ned sẽn sikd a meng zãng fasɩ, yãmb a Wẽnnaam ka tõdgd a soab ye.
20
Maan-y Sɩyõ neer y nonglmã pʋga, Me-y Zeruzalɛm lalsã!
21
Woto, yãmb sũur na n yɩɩ noog ne tɩrlem maando. Yaa maoong sẽn yõogd bugum, ne bark pʋʋsg maoong sẽn yõogd bugum. Dẽ, b na n maanda lols maand y tẽn-kugrã zugu.
Mossi MPBU 2014
Moore Bible Bible Society of Burkina Faso, 2014
:
Save Notes