1
Ako Mbori, mo íni pai fere, ku sangba ga weneringise yo; mo gbándaka pa gi samungu a wa du gamo wene nunga aboro ni ngenge he.
2
Mo zúndu re kpou be gi irairapai, ki girisi re be gi ingapai!
3
Bambiko mi idi pa gi samungu, gi ingapai bangire kindi.
4
Kina ro sa, mi aingi pai kuti ro, ki mangi gi gbigbitapai re ku bangiro, ya ga pai dũ ni ruru he ho mo nagumba apai ni, ki du ni ruru ro ho mo nasapa ngbanga ni.
5
Mo ngére, i ame re na irairapai, nina ki du na mobarare na kina ingapai.
6
Mo ngére, du rengo kpotoboro yo ngba ha angba ti ro; mo yúgu pa ina tatamana fere rogo gu pare gbu agbu.
7
Mo gírisi re na kpengua nga usopo, mi ki giri; mo zúndu re, mi ki vuru ki susi morogumba.
8
Mo yá fere mi gi pa wasa na ngbarago; ya agu ameme mo akuadi he si du pusiapusia.
9
Mo óko kpakpuro ti gimi ingaapai, ki gbandaka gimi irairaapai dunduko.
10
Ako Mbori, mo fú gigiri kpoto yo ku rogo re yo, ki mbakadi torore berewe ku rogo re yo ni ruru he nyanyaki.
11
Ka mo bá nga re bara bangiro ku sa yo, ki di ga Ziazia Toro ti re ya.
12
Mo káraga gu wasa nga ga ga bata fere, ki nisongodi re ni wene esuesu toro.
13
Si du mi ka yugo gamo agene ti ni fu atiandika, aboro ingapai ki karaga tiyo koyo du mo ni.
14
Ako Mbori, mo bátasi re be pa kure imoboro, mo nga Mbori nga gi bata, ngbare ki bi bia ni wa wa tipa pa ga ruru mangapai.
15
Ako Gbia, mo nizá ngbare, ngbare atáka pande pa tambuaro.
16
Bambiko rago naangba nga ti ro tipa motumo te; ka mi afu zozo motumo rago angba nga ti ro tipa ha te.
17
Gu motumo ngba ti Mbori nga toro rungo; gu kpoto yo naima be rungo ingapai, Ako Mbori, mo apáyasi nga ha te.
18
Mo mángi wenepai fu Siona a wa du pa ga wene ngbanya; mo dúa angapa Yerusarema berewe,
19
si du rago angbá ti ro ti ni tipa ruru amotumo, tipa zozo amotumo na gu zozo amotumo du na baha; i atúmo na abaabagara ku ri ga bamotumo.
Zande Bible 1978
La Sainte Bible en Zande Alliance Biblique Universelle, 1978