×

現代台語譯本羅馬字版

詩篇 53

1
Gōng-lâng sim-lāi kóng, “Bô Siōng-tè.” In lóng hú-pāi, chòe khó-ò͘ⁿ ê tāi-chì, bô kah chi̍t ê chòe hó.
2
Siōng-tè tùi thiⁿ àⁿ lo̍h-lâi khòaⁿ sè-kan-lâng, beh khòaⁿ ū bêng-lí, ū chhē-kiû Siōng-tè ê lâng á bô.
3
In ta̍k-ê lâng lóng kiâⁿ bê-lō͘, pîⁿ-pîⁿ pìⁿ-chòe ù-òe; bô lâng chòe hó, liân chi̍t ê to bô.
4
Chòe pháiⁿ ê lâng kiám lóng m̄ chai? In thun-chia̍h góa ê chú-bîn chhin-chhiūⁿ teh chia̍h-pn̄g; in bô kiû-kiò Siōng-tè.
5
In tī m̄-bián kiaⁿ-hiâⁿ ê sî tōa kiaⁿ-hiâⁿ; in-ūi Siōng-tè ū chiong pau-ûi kong-kek lí ê lâng ê kut-thâu iā-sòaⁿ; in ōe kiàn-siàu sit-pāi, in-ūi Siōng-tè khì-sak in.
6
Goān Í-sek-lia̍t ê chín-kiù tùi Sek-an chhut! Goān Siōng-tè chhōa I siū-lia̍h ê chú-bîn tò-tńg--lâi! Hit-sî, Í-sek-lia̍t ōe hoaⁿ-hí, Ngá-kok ōe khoài-lo̍k!
Chinese TTVR
The Bible Society in Taiwan
:
保存笔记