×

Cakepan Suci 1990

KIDUNG 54

1
Duh Ratu Sang Hyang Widi Wasa, rahayuangja titiang antuk kakuasan Palungguh IRatu. Bebasangja titiang antuk kawisesan Palungguh IRatu!
2
Duh Ratu Sang Hyang Widi Wasa, pirengangja pangastawan titiange. Pirengangja atur titiange!
3
Parajadmane sane sumbung pada rauh nglurug titiang. Jadmane sane angkara murka miwah sane nenten lingu ring Ida Sang Hyang Widi Wasa pada mamanah ngamademang titiang.
4
Nanging Ida Sang Hyang Widi Wasa punika dados panulung titiange. Ida Sang Panembahan dados patindih titiange.
5
Dumadak Ida Sang Hyang Widi Wasa nyisipang meseh-meseh titiange antuk kacorahanipune newek. Ida jaga nyirnayang ipun, santukan Ida maraga satia tuu.
6
Duh Ratu Sang Hyang Widi Wasa, titiang saking liang jaga ngaturang aturan ring ayun Palungguh IRatu. Titiang jaga ngaturang panyuksma ring ayun Palungguh IRatu, santukan Palungguh IRatu maraga becik.
7
Palungguh IRatu sampun ngluputang titiang saking sakancan kamewehan titiange, tur titiang sampun ngeton meseh-meseh titiange pada kaon.
Balinese Bible 1990
Today's Bali Bible “Cakepan Suci” Indonesian Bible Society, 1990
:
Save Notes