×

Bukuit Ne Tilil 2020

TIENWOGIKAL 55

1
Epchi it saennyu, ee Kamuktaindet; Ameung’egei somsennyu.
2
Kaswa, ak iwolwa: Aiimige amamuunyi eng’ kabwatutikyuk, ak atigeni;
3
Amu kutitab bunyot, Amu surietab kiptengekyot; Amu wirjina tengekto, Ak wecha eng’ neregek.
4
Tinyei ng’wanindo ne o muguleldanyu: Ak kagobutya kamuisosiekab meet.
5
Kagobwanja kaiyweisiet ak botanet, Ak kagotucha arogenet.
6
Ak kiale, Bwa, nda katinye kebebaik ko u cheptuget! Ta kaatiriren, ak amuuny.
7
Keero, ta kiawe ole loo, Ak ameny ong’atet.
8
Ta kiasib amwechi ole aung’egei Eng’ usonet ne korom ak kipchurjuriet.
9
Ng’em, ee Kiptaiyat, ak itoiye ng’elyebwekwak: Amu koageer koromnatet ak boriet eng’ nganaset.
10
Yiemei irimosiek bet ak kemoi; Mi kwenutab nganaset tengekto ak wasetab ge.
11
Mi tengekto kwenunnyi: Maistoegei suriet ak ng’alset ortinwekyik.
12
Amu kima ko bunyot ne kirosya: Nda ki bunyot ta kiamuitoi: Ama inendet ne kiwecha ne kiilosunenagei; Amu ta kiaung’egei inendet:
13
Ago ki inye ne kiaechine, Choruennyu ak ne kingenge.
14
Kiging’alaljige eng’ ng’alek che anyiny, Ak kigibe gotab Jehovah koboto tuiyet.
15
Ingoche meet ichek, Ak ingororokyi keringet kosoptos: Amu mitei yaitwogik gorikwak ak kwenunywa.
16
Ago aguure ane Kamuktaindet; Ak kosorua Jehovah.
17
Atigeni, ak arire, koskoleny, ak karon, ak bet kwen: Si kogas kutinnyu inendet.
18
Kigotiach sobondanyu eng’ kalyet eng’ luget ne kimachei kogirindaa: Amu ki chang’ ichek che kibelige:
19
Kasei Kamuktaindet, ak kowolji ichek, Agot inendet ne kimi koboch keny, Bik che ma walaksei, Ama konyiti Kamuktaindet.
20
Kigoita eunekyik kole konam che kitinyei kalyet ak inendet: Kigosamis kayomisennyi.
21
Ki chabai kutinnyi kosiir mwaitab chego, Ago kimi luget muguleldanyi: Ki tangus ng’alekyik kosiir mwaita, Ago ki rotokab chok che kaging’us.
22
Ituuchi Jehovah nyigisindang’ung’, si kotiin: Magoi cham inendet keisto ne bo imanda.
23
Ago inye Kamuktaindet, irorogu koba keringetab ng’emisiet: Matarei rumik ak ng’alik kebebertab betusiekwak; Ago amang’un inye.
Kalenjin Bible 2020
God's word open for all Bible Society of Kenya, 2020
:
Save Notes