×

Ika Bible 2018

Ẹbụ-ọma 57

1
Chuku, dodo mẹ omikẹn m, dodo mẹ omikẹn m, nị ịyụ kẹ m gbọnni. Okpuru nku i kẹ m k'a nọdị d'e ru ni ntikpọnị a ghafegụ!
2
A kpọku m Chuku; a kpọku m Onyẹ hụn Kachanrịnnị, Chuku hụn a rụnzu ihiẹn ọ kwademẹni m.
3
O k'a gha elu-igwee zihẹni m nzụọpụha; o k'a jụgbọ ndị rị a bịangbuni m. Osolobuẹ k'e mẹni m k'o dọn e mẹni ndị nke ẹ, o k'e mẹ k'o mẹ.
4
M rị nwan imẹ igunrun ẹwọrọ; m dịnọ nwan imẹ igunrun ẹwọrọ ndị e ri ịhịan; obo lẹ ọbara-ụta kẹ eze wẹ wụ, ire wẹ wụ ọpịa-agha tụ nkọ!
5
Ọghọ ị ya pụha elu-igwere; ọghọ ị ya pụhazị elu-ụwa ile!
6
Wẹ te shitọnị m ọnyan kẹ ndụn gụgụ m; Wẹ gutọnị m mgbugbu ụzọ, kanị wẹ lẹ enwẹn wẹ a danyegụọ imẹ ẹ.
7
Chuku, obi emẹhunmẹkọ m; obi emẹhunmẹkọ m! M k'a bụ ẹbụ; m k'a bụ ẹbụ ọjịja-mma!
8
Obi m, tẹnhin! Ụbọ mmaka lẹ ụbọ-layẹ tẹnhin ni! Mmẹ k'a kpọtiẹndẹ ụtụntụn!
9
M k'a kpanmịn ị Di-nwọnni-ẹnyi, imẹ igunrun ndị alị ichẹn-ichẹn; m k'e gi ẹbụ ja ị mma imẹ alị ndị ọzọ.
10
Makẹni ihiẹn-ọsụsụọ ị jẹnhandẹ elu kẹ igwere; kẹ orukpu dọn jẹn elu ọda-ọda, ẹrịra k'i dọn wụ Onyẹ w'e gi e dọn ẹnya ọda-ọda.
11
Ọghọ ị ya pụha elu-igwere; ọghọ ị ya pụhazị elu-ụwa ile!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes