×

Maayong Balita 2012

SALMO 58

1
Nagahatag bala kamo sing matarong nga pamatbat, kamo nga mga pangulo? Nagahukom bala kamo sing matarong sa tanan nga mga tawo?
2
Wala! Ang ginahunahuna lamang ninyo amo ang kalautan nga inyo himuon, kag nagahimo sang pagpakasala nga amo ang mga pagpamintas sa duta.
3
Ang malaut nga mga tawo nagasayop sa bug-os nila nga kabuhi, nagabinutig sila halin pa sa adlaw sang ila pagkatawo.
4
Dalitan sila subong sang mga man-og, ginatakpan nila ang ila mga dulonggan subong sang bungol nga kobra,
5
nga indi makabati sang tingog sang iya manug-anta, ukon sang orasyon sang sampaton nga madyikero.
6
Bingawa ang ila mga ngipon, O Dios, taltala ang mga bangkil sining mapintas nga mga leon!
7
Kabay nga mawala sila kaangay sang tubig nga nagakahubas, kabay nga tasakon sila subong sang mga hilamon sa dalan.
8
Kabay nga manginsubong sila sang mga taklong nga nagakatunaw sa maarat nga lunang, kabay nga manginkaangay sila sang lapsag nga patay na sang iya pagkatawo nga wala gid makakita sang kapawa.
9
Sa wala pa sila makapanginlaman, ginahagbas sila subong sang kahuykahoy, paapukon sila sang Dios sa iya tuman nga kaakig samtang buhi pa sila.
10
Magakalipay ang mga matarong kon makita nila nga ginasilutan ang mga makasasala, magaubog sila sa dugo sang mga malaut.
11
Magasiling ang mga tawo, “Ginahatagan gid matuod sing balos ang mga matarong, may Dios gid matuod nga nagahukom sang kalibutan.”
Ilonggo Bible 2012
Maayong Balita nga Biblia Philippine Bible Society, 2012
:
Save Notes