×

Ika Bible 2018

Ẹbụ-ọma 59

1
Chuku m, dodo zụọpụha m ẹka ndị-iṅẹnrẹn m; ẹka ndị bunụmanị m! Bu m zuemẹ ebe jẹn elu.
2
Zụọpụha m ẹka eje-ndị; zụọpụha m ẹka ndị-izighẹ!
3
Lee kẹ wẹ rị nwan e che nị wẹ gbu m; ndị ẹka-ikẹn rị e zuni m eje-umẹ, Euu Osolobuẹ, emẹni m wẹ njọ, emẹni m eje-ihiẹn;
4
onwọnni ebe ikpe nọ ma m bụ wẹ hụkwọ a chụ m, arị wẹ e ledẹ ẹnya azụụn! Dodo, lihi n'i buruhẹ m! E lee nsọngbu m rị imẹ ẹ!
5
Osolobuẹ, Chuku ihiẹn ile rị okpuru ẹ, Chuku ndị alị Izrẹlụ! Tẹnhin nwan, n'i ye alị ndị ghalẹni e fe i afụnfụn! Ahatukwọlẹ onyẹ ọwụlẹ imẹ ndị ẹkanaị ahụn rị e mẹ eje-ihiẹn!
6
W'a pụha ẹnyasị, e yi oro kẹ nkitẹ, e jẹnhunmẹ imẹ obodo.
7
Lee ihiẹn rị a gha wẹ ọnụ a pụha! Ọpịa-agha tụ nkọ rị wẹ ọnụ! Wẹ hụ a sị enwẹn wẹ, “Onwọnni onyẹ k'a nụ ihiẹn ẹnyi rị e ku!”
8
Kanị ẹmụ kẹ y'a mụ wẹ, Osolobuẹ; ẹmụ kẹ y'a mụ alị ile ghalẹni e fe i!
9
Ikẹn Chuku kẹ m gi e dọn ẹnya, makẹni, Chuku kẹ m gbọnni.
10
Chuku m k'e gi ufiri ihiẹn-ọsụsụọ a tụnị m ụya; o k'e mẹ m gi ẹnya m hụn ndị iṅẹnrẹn m alị.
11
Kanị, egbulẹ wẹ, amamgbe ndị nke m a zọ ikẹn i. Ka gi ikẹn i kpayịya wẹ, y'e welụa wẹ alị, dodo Osolobuẹ, Akpaịn hụn e che ẹnyi nche.
12
Makẹ njọ wẹ rị e gi ọnụ wẹ e mẹ, makẹ ihiẹn gha wẹ ọnụ a pụha, mpache wẹ rị a pache ya nwụndọn wẹ kẹ ọnyan! Ufiri ọnụ wẹ rị a bụ lẹ ntụ wẹ rị a tụ,
13
gi iwe tikpọ wẹ, tikpọchanrịn wẹ d'e ru n'a gụ wẹ, kẹni ịhịan ile marịn nị Osolobuẹ rị a kị imẹ Izrẹlụ, alị Jekọpụ, lẹ ebe ile ụwa ru.
14
Ẹnyasị a pụhazị wẹ, e yi oro kẹ nkitẹ, e jẹnhunmẹ imẹ obodo;
15
a wahunmẹ, a chọ ihiẹn-oriri, eki e we fọn, mmanị ẹfọ jun wẹ.
16
Mmẹ nwẹn, m k'e gi ẹbụ ku oku ikẹn i; ụtụntụn ile e gi m ihiẹn-ọsụsụọ ị bụ ẹbụ. Makẹni y'a wụrụgụọ ebe m'a gbaban, ebe m nọ a wanahịn nsọngbu.
17
Euu Ikẹn m, m k'e gi ẹbụ ja ị mma, makẹni Chuku kẹ m gbọnni, Chuku hụn nwọn ihiẹn-ọsụsụọ m.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes