×

Maayong Balita 2012

SALMO 59

1
O Dios ko, luwasa man ako sa akon mga kaaway, apini ako sa mga nagagubat sa akon!
2
Luwasa ako sa sadtong malaut nga mga tawo, tabangi ako sa sadtong mga manugpatay!
3
Tan-awa! Nagahulat sila sa pagpatay sa akon! Ang mapintas nga mga tawo nagaplano batok sa akon. Indi tungod sang sala ukon malain nga akon nahimo,
4
indi tungod sang akon kasaypanan, O Ginoo, nga sila nagadalidali sa pagsalakay sa akon.
5
Bangon ka, Ginoong Dios sang mga hangaway, palapit ka man sa pagtabang sa akon, ikaw gid ang magtan-aw, O Dios sang Israel! Magmata ka kag siluti yadtong mga wala nagatuo sa Dios, indi pagkaluoyi inang malaut nga mga traidor!
6
Nagabalik sila kon gab-i, nga nagangurob subong sang mga ido sa ila paglibot sa siudad.
7
Pamatii ang ila mga pagpang-insulto kag mga pamahog. Ang ila mga dila kaangay sang mga espada sa ila mga baba, pero nagapamangkot pa sila, “Sin-o bala ang makabati sa aton?”
8
Pero ginakadlawan mo lang sila, O Ginoo, ginayaguta mo lang ang tanan nga wala nagatuo sa imo!
9
May pagsalig ako sa imo kusog, ikaw ang akon dalangpan, O Dios.
10
Ang akon Dios nga nagahigugma sa akon magapalapit sa akon, ipakita niya sa akon ang pagkalutos sang akon mga kaaway.
11
Indi sila pagpamatya, O Dios, agod nga indi malipat ang akon mga tawo. Paalaplaaga sila kag lutosa sila sang imo gahom, O Ginoo, nga amon mangangapin!
12
Ang sala yara sa ila mga bibig, malaut ang tanan nila nga ginapanghambal, kabay nga madakop sila sa ila pagkabugalon! Tungod kay nagapasipala sila kag nagabutig,
13
laglaga sila sa imo kaakig, papasa sila sing bug-os. Dayon ang tanan nga mga tawo makahibalo nga ang Dios nagagahom sa Israel, nga ang iya paggahom nagasakop sang bug-os nga kalibutan!
14
Ang akon mga kaaway nagabalik kon gab-i, nga nagangurob subong sang mga ido sa ila paglibot sa siudad.
15
Nagalibot sila sa pagpangita sang pagkaon, kag nagangurob kon indi sila mabusog.
16
Pero magakanta ako nahanungod sang imo gahom, sa tagsa ka aga magakanta ako sing matunog nahanungod sang imo mapinadayunon nga gugma. Ikaw nangindalangpan ko, palanaguan sa tion sang kinagamo.
17
Dayawon ko ikaw, akon mangangapin, ang akon dalangpan amo ang Dios, ang Dios nga nagahigugma sa akon.
Ilonggo Bible 2012
Maayong Balita nga Biblia Philippine Bible Society, 2012
:
Save Notes