×

Fɔs Oli Baybul 2013

Sam 59

1
PAPA GƆD, pul mi na mi ɛnimi dɛn an; Sev mi frɔm ɔl udat de biɛn mi.
2
Dɛn de fɔ du bad ɛn sɔm de sɛf we wan kil.
3
Luk aw dɛn kak mi trap! Dɛn dɔn wayl pan mi pan ɔl we a nɔ du natin.
4
A nɔ du natin rɔŋ bɔt dɛn want fɔ kil mi. PAPA GƆD, grap mek yu ɛp mi, ɛn si to mi stren.
5
PAPA GƆD yu na PAPA GƆD we pas ɔl ɔda gɔd, di PAPA GƆD we Izrɛl de wɔship, grap, ɛn du sɔntin; pɔnish ɔl di ɔda neshɔn dɛn. Nɔ mek dɛn go skɔchfri, na dɛn de sɛl wi,
6
Ivintɛm, dɛn kin kam bak usay dɛn bin de ɛn bigin pas pas de bak lɛkɛ dɔg.
7
Di wɔd dɛn we de kɔmɔt na dɛn mɔt de chuk lɛk nɛf. Dɛn min se nɔbɔdi nɔ de yɛri di bad tɔk dɛn we dɛn de tɔk.
8
Bɔt PAPA GƆD yu we na PAPA GƆD de yɛri so yu de laf dɛn; yu jɛs de laf ɔl dɛn ɔda neshɔn.
9
PAPA GƆD, yu we na mi trɛnk, a de luk ɔp to yu Yu na lɛk kɔbaklos to mi.
10
Na yu na di PAPA GƆD we lɛk mi yu go go bifo mi ɛn yu go mek a si aw yu de pul mi ɛnimi dɛn kɔmɔt biɛn mi.
11
PAPA GƆD, we yu de kɔba mi, nɔ mek lɛ dɛn day wantɛm o, ɔ nɔ so ivin mi pipul nɔ go mɛmba aw yu dil wit dɛn ɛnimi. Yuz yu mayti pawa fɔ skata dɛn ɔlɔbɔt bifo yu dɔnawe wit dɛn.
12
Mek di sem wɔd we bin de kɔmɔt na dɛn mɔt trap dɛn; lɛ di big tɔk we dɛn bin de tɔk bi dɛn trap. Fɔ ɔl di kɔs ɛn swɛ ɛn bad tɔk we dɛn bin de tɔk,
13
nɔ lɛf dɛn so lɛ dɛn sɔfa fɔ dat. Dɔn ɔlman na wɔl go no se nɔto Izrɛl nɔmɔ yu de rul, yu na PAPA GƆD fɔ di wanol wɔl.
14
Ivintɛm, dɛn kin kam bak usay dɛn bin de ɛn bigin pas pas de bak lɛkɛ dɔg.
15
Lɛkɛ di dɔg dɛn, dɛn go de fɛn tin fɔ it ɛn if dɛn nɔ gɛt wetin dɛn want, trɔbul go fɔdɔm.
16
Bɔt mi go siŋ ɛn prez PAPA GƆD, bikɔs i pawaful Na mɔnin a go siŋ ɛn prez am fɔ in lɔv we nɔ de ɛva chenj. In na lɛk kɔbaklos to mi, In na di wan we de pul mi pan trɔbul.
17
PAPA GƆD, yu na mi trɛnk A go siŋ ɛn prez yu, Yu na lɛk kɔbaklos to mi. Yu na PAPA GƆD we lɛk mi ɔltɛm.
Krio Bible 2013
Krio Bible The Bible Society of Sierra Leone, 2013
:
Sev Notis dɛn