×

पवित्रशास्त्र, मराठी समकालीन आवृत्ती

स्तोत्र ६३

1
हे परमेश्वरा, तुम्ही माझे परमेश्वर आहात, मी तुमचा कळकळीने शोध करतो; या कोरड्या आणि वैराण भूमीत माझा जीव तुमच्यासाठी तहानलेला झाला आहे; माझे सर्वस्व तुमच्यासाठी किती उत्कंठित झाले आहे.
2
तुमचे सामर्थ्य आणि गौरव मी तुमच्या पवित्रस्थानी पाहिले आहे.
3
कारण तुमची प्रीती जीवनाहून उत्तम आहे, माझे ओठ तुमचे गौरव करतील.
4
माझ्या जिवात जीव आहे तोपर्यंत मी तुम्हाला धन्यवाद देईन आणि माझे हात तुमच्या नावाने उंच करेन.
5
उत्कृष्ट भोजनाने व्हावे तसा मी तृप्त होईल; गीत गाणार्‍या ओठांनी मी तुमची स्तुती करेन.
6
माझ्या बिछान्यावर मी तुमचे स्मरण करतो; रात्रीच्या प्रत्येक प्रहरी मी तुमचे मनन करतो.
7
कारण तुम्ही माझे साहाय्य आहात, तुमच्या पंखांच्या सावलीत मी गीत गातो.
8
मी तुम्हाला बिलगून राहतो; तुमचा उजवा हात मला सावरून धरतो.
9
जे मला मारू इच्छितात त्यांचा नाश होईल; ते पृथ्वीच्या खोल रसातळी जातील.
10
तलवारीच्या धारेने ते पडतील; कोल्ह्यांचे ते भक्ष्य होतील.
11
परंतु राजा परमेश्वरामध्ये उल्हास करेल; जे लोक परमेश्वराची शपथ घेतात, ते सर्व त्याचे गौरव होईल; परंतु लबाडांची तोंडे बंद होतील.
Marathi Bible MRCV 2024
पवित्रशास्त्र, मराठी समकालीन आवृत्ती™ ग्रंथाची मालकी 1978, 1982, 2008, 2021, 2022, 2024 Biblica, Inc. यांची परवानगी घेऊन केले गेले आहे. सर्व अधिकार जगभरात राखीव
:
टिपा जतन करा