×

現代台語譯本羅馬字版

詩篇 64

1
Siōng-tè ah, góa bâi-oàn ê sî, kiû lí thiaⁿ góa ê siaⁿ; kiû lí pó-hō͘ góa ê sìⁿ-miā bián kiaⁿ tùi-te̍k ê hām-hāi.
2
Kiû lí chiong góa khǹg-ba̍t, hō͘ góa thoat-lī siâ-ok ê lâng ê im-bô͘, thoat-lī chòe pháiⁿ ê lâng ê kè-bô͘.
3
In bôa in ê chi̍h chhin-chhiūⁿ bôa to; in ēng ok-to̍k ê ōe chòe chìⁿ teh biâu-chún,
4
bâi-ho̍k beh siā bû-ko͘ ê lâng; in hut-jiân siā i, chhiú mā bô chhoah.
5
In chham-siông pháiⁿ kè-bô͘; àm-tiong siat-kè, tiuⁿ lô-bāng, kóng, “Siáⁿ-lâng ōe khòaⁿ-tio̍h lán?”
6
In tô͘-bô͘ pháiⁿ-tāi, kóng, “Goán í-keng ū siūⁿ-chhut siōng cheng-bi̍t ê kè-bô͘.” Lâng ê sim-su liām-thâu si̍t-chāi ū-kàu khúi-chà.
7
M̄-kú Siōng-tè beh ēng chìⁿ siā in; in ōe hut-jiân tio̍h-siong.
8
In ōe hō͘ ka-kī kóng ê ōe hāi-sí; khòaⁿ--kìⁿ ê lâng lóng ōe iô-thâu.
9
Chèng-lâng lóng ōe kiaⁿ-hiâⁿ, beh pò-iông Siōng-tè ê só͘-chòe, siông-sè siūⁿ I ê chok-ûi.
10
Gī-lâng ōe in-ūi Siōng Chú lâi hoaⁿ-hí, mā ōe óa-khò I tit-tio̍h an-choân. Só͘-ū sim chèng-ti̍t ê lâng lóng ōe chheng-chàn I.
Chinese TTVR
The Bible Society in Taiwan
:
保存笔记