×

Maayong Balita 2012

SALMO 64

1
Yari ako sa kagamo, O Dios, pamatii ang akon reklamo! Nahadlok ako sa akon mga kaaway, luwasa ang akon kabuhi!
2
Apini man ako sa mga pagplano sang mga malaut, sa pagsalakay sang malain nga mga tawo.
3
Ginabaid nila ang ila mga dila kaangay sang mga espada, kag ginapuntariya nila ang ila masakit nga mga pulong kaangay sang mga baslay.
4
Halin sa ila ginapanaguan ginapana nila ang maayo nga mga tawo, sa hinali nagapana sila kag wala nagakahadlok.
5
Ginapaisog nila ang isa kag isa sa ila malaut nga mga plano, ginahambalan nila kon diin nila ibutang ang ila mga siod. Siling nila, “Kinahanglan nga wala sing may makakita sini.”
6
Nagaplano sila sing malaut kag nagasiling, “Wala sing may makahibalo sang aton plano.” Indi mapaktan ang tagipusoon kag panghunahuna sang tawo!
7
Pero ginapana sila sang Dios, kag sa hinali napilasan sila.
8
Pagalaglagon niya sila tungod sang ila mga ginahambal, ang tanan nga makakita sa ila magalungolungo sang ila mga ulo.
9
Magakahadlok sila tanan, magapanumdom sang mga binuhatan sang Dios, kag magasugid sila sang iya mga ginhimo.
10
Ang tanan nga matarong nga mga tawo magakalipay tungod sang mga ginhimo sang Ginoo. Magadangop sila sa iya agod indi maano, ang tanan nga maayo nga mga tawo magadayaw sa iya.
Ilonggo Bible 2012
Maayong Balita nga Biblia Philippine Bible Society, 2012
:
Save Notes