×

Ika Bible 2018

Ẹbụ-ọma 66

1
Ụwa ile, yini ni Chuku oro ịghọghọ!
2
Gi ni ẹbụ ja ẹfan a mma! Ja n'a mma ọhụnma-ọhụnma!
3
Sị nị Chuku, “Y'a rụnka ọrụn a tụ egun! Makẹni ikẹn i e hikẹ ogbe ya haịn ndị-iṅẹnrẹn i gi a man'ị piripiri.
4
Ụwa ile a kụn'ị isi alị; a bụn'ị ẹbụ ịja-mma; w'e gi ẹbụ a ja ẹfan ị mma.”
5
Bịa nị d'e lee ihiẹn Osolobuẹ rụn; ọrụn a tụ egun ọ rụnnị ịhịan!
6
Ịya gi ohimin họnrin akpakalị; ndị nke ẹ nọ gi ụkụ fetu; nị ẹnyi gi ihiẹn o mẹ ebẹhụ ghọghọ;
7
Makẹ ikẹn hụn o nwọn, ọ kị jẹnrin e jẹn, ẹnya a hụ e lee alị ile: ndị nnupụ-isi wẹ ebushikwọlẹ enwẹn wẹ elu!
8
Ndị alị ile, ja nị Chuku ẹnyi mma; jan'a hụn w'a nụ ọhụnma-ọhụnma.
9
Makẹni ịya dọnmẹ ẹnyi ndụn, ọ nịnị ẹnyi kpori.
10
Y'e lelegụọ ẹnyi, Osolobuẹ, kẹ wẹ e lele siliva imẹ ọkụn.
11
Y'e bugụọ ẹnyi che imẹ ọnyan; y'a kpọmagụọ ẹnyi ẹgan ukun;
12
y'a nịgụọ ịhịan zọ ẹnyi ụkụ isi; ẹnyi nọ gha imẹ ọkụn, gha imẹ mirin! Kanị, y'e wepụhagụọ nwan ẹnyi, bu ẹnyi che ebe ẹhụ a nọ fu ẹnyi.
13
M wela ẹjan w'a dụn ọkụn iwe i; m k'e mẹzu nkwa m kwe i,
14
ihiẹn m shịapụ ọnụ kwe i nkwa a kẹ m rị imẹ nsọngbu.
15
M k'e gi anụ m kachanrịn mma chụnyen'i ẹjan w'a dụn ọkụn, e gi m ebulu chụnyen'i ẹjan w'a dụn ọkụn, ẹnwụnrụn a alọshin'i elu, e gizi m okẹn-efin lẹ ewu chụnyen'i ẹjan.
16
D'e gọn ni ntịn, ụnụ ile hụn a gbaye Chuku, nị m kọnị ụnụ ihiẹn o mẹni m!
17
A kpọkughọ m'a, gi ẹbụ ja a mma.
18
Omẹni m te rị e ro njọ, Osolobuẹ eke gọn m ntịn.
19
Kanị Chuku e gọnghọ m ntịn, ọ nụgụọ ekpere m.
20
Chuku arịka mma ebe ọ nọlẹni jụ ekpere m mọbụ jụ n'ọ ghọsịkọ m ihiẹn-ọsụsụọ onyẹ nke ẹ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes