1
Hinugyaw sa Dios, bug-os nga duta;
2
ambaha ang himaya sang iya ngalan: pahimayaa ang iya pagdayaw!
3
Isiling sa Dios, “Daw ano kamakakulugmat sang imo mga binuhatan! Sa pagkadaku sang imo gahum magapasakup sa imo ang imo mga kaaway.
4
Ang bug-os nga duta magasimba sa imo; magaamba sila sing pagdayaw sa imo, magaamba sila sa imo ngalan.” Sela
5
Kari kag tan-awa ang mga binuhatan sang Dios: makakulugmat sia sa ginahimo niya ayon sa mga anak sang mga tawo.
6
Ang dagat ginbalhin niya nga mamala nga duta; ginlatas nila ang suba sa tiil. Didto nagakasadya kita sa iya,
7
nagadumala sia tungud sa iya kusug sa gihapon, ang iya mga mata nagapanilag sa mga pungsud— indi magpakataas sa ila kaugalingon ang mga masinumpungon. Sela
8
O pakamaayoha ang aton Dios, kamo nga mga katawohan, ipabati ang tingug sang iya pagdayaw,
9
nga nagakaput sang aton kalag sa kabuhi, kag wala nagatugut nga ang aton mga tiil malingkang.
10
Kay ikaw, O Dios, nagtilaw sa amon; ginsanghid mo kami subong sang pagsanghid sang pilak.
11
Ginpasulud mo kami sa batong; ginlulanan mo kami sing tama sa amon mga balikawang;
12
ginpasakay mo ang mga tawo sa amon mga olo; nag-agi kami sa kalayo kag sa tubig; apang ginpagowa mo kami pakadto sa duug nga bugana.
13
Magasulud ako sa imo balay nga may mga halad-nga-sinonog; magabayad ako sa imo sang akon mga saad,
14
nga ginmitlang sang akon mga bibig kag ginpamolong sang akon baba sang sa kalisdanan ako.
15
Magadolot ako sa imo sing mga halad-nga-sinonog nga pinatambok, upud sa incienso sang mga carnero nga lalaki; magahalad ako sing tinday nga mga baka nga lalaki pati ang mga kanding. Sela
16
Kari kag pamati, tanan kamo nga nagakahadluk sa Dios, kag ipahayag ko ang iya nahimo tungud sa akon kalag.
17
Nagtuaw ako sa iya sa akon baba, kag ginpakataas sia sang akon dila.
18
Kon ginapalabi ko ang kalautan sa akon tagiposoon, ang Ginoo indi magpamati.
19
Apang sa pagkamatuud ang Dios nakabati; naglingig sia sa tingug sang akon pangamuyo.
20
Pakamaayohon ang Dios, nga wala magsikway sang akon pangamuyo ukon sang iya malig-on nga paghigugma gikan sa akon!
Ilonggo Bible 1982
Ang Biblia 1982 Philippine Bible Society