×

BIBELE 1951

Lipesaleme 66

1
Lena mafase ohle, thabelang Modimo ka mekgolokwane.
2
Hlabang sefela sa borena bja leina la gagwe, godišang bothakga bja ditheto tša gagwe.
3
Le mmolele le re: Modimo, mediro ya gago ga se ka go šiiša! Manaba a gago a loba a bone bogolo bja maatla a gago.
4
Lefase ka moka a le go lotšhe, le go binele, le hlabe sefela sa leina la gago.
5
Tlang le bone ditiro tša Modimo; o a šiiša ka tše a di dirago go bana ba batho.
6
Lewatle o kile a le šatola ya ba naga ye e omilego; noka ba e setše ka dinao; ke moo re kilego ra thaba ka yena.
7
O buša ka maatla a gagwe neng le neng; mahlo a gagwe a leta ditšhaba, bahlanogi ba se ke ba tsoga.
8
Hee lena ditšhaba! Retang Modimo wa rena; Le hlaboše mantšu a go mo godiša.
9
Yena wa go bolokela meoya ya rena bophelo, a se lese dinao tša rena tša thedimoga.
10
Modimo, ga o lese go re leka, ra etša tshipitshehla ye e tšwago meubeng.
11
O re išitše kgolegong, wa rweša magetla a rena bothata.
12
Wa lesa batho ba re gata dihlogo, ra tsena ka meetseng le ka mollong; mme wa ba wa re tšweletša molaleng.
13
Ngwakong wa gago ke tla le dihlabelo; ke phetha tše ke go enetšego tšona.
14
Tše ke di boletšego ka molomo, tša tšwa ganong ga ka mohla wola ke tlaletšwe.
15
Ke go tlišetša dihlabelo tša go nona, le diorelo tša makhura a dikgapa; ke go hlabela kgomo le dipudi.
16
Tlang le kweng ka moka ba go boifa Modimo, ke le anegele tšohle tše a di dirilego moya wa ka.
17
Ge ke mmitša ka molomo wa ka, ke ge leleme la ka le šetše le na le tebogo.
18
Ge pelo ya ka e kabe e nyaka tša bobe, Morena a kabe a sa ka a nkwa.
19
Mme bjale Modimo o nkwile, a utlwela ruri ge ke rapela.
20
A Modimo a lebogwe, gobane ga a ka a nyatša thapelo ya ka, ga a ka a ntlhokiša botho bja gagwe.
Sotho Bible 1951
Bible Society of South Africa 1986
:
Boloka Lintlha