Kantahi ninyo ang Dios; kantahi ninyo siya sang mga pagdayaw. Dayawa ninyo siya nga nagasakay sa panganod. Ang iya ngalan amo ang Ginoo; magkalipay kamo sa iya presensya.
Ginahatagan niya sang pamilya ang mga nagaisahanon kag ginahilway niya sing malipayon ang mga ginbihag. Pero ang mga rebelde magaestar sa mamala kag mainit nga duta.
Bisan ang mga nagpabilin sa toril sang mga karnero ginpartihan sang mga imahen sang pating nga ang mga pakpak nahaklapan sang pilak kag ang punta sang pakpak nahaklapan sang puro nga bulawan.”
Pagsaka niya sa mataas nga lugar madamo nga bihag ang iya gindala kag nagbaton siya sang mga regalo halin sa mga tawo, bisan sa rebelde nga mga tawo. Kag didto magapuyo ang Ginoong Dios.
Nagauna ang gamay nga tribo ni Benjamin, sunod amo ang mga pangulo sang Juda upod sang ila grupo, kag sunod amo ang mga pangulo sang Zebulun kag Naftali.
Sabdunga inang nasyon nga pareho sa mabangis nga sapat sa matag-as nga mga hilamon. Sabdunga man ang mga katawhan nga pareho sa turo nga mga baka nga kaupod sang bataon nga mga baka hasta nga magsurender sila kag maghalad sang ila mga pilak sa imo. Laptaha ang mga katawhan nga nalipay sa inaway.
Makatilingala ang Dios sang Israel samtang nagapaguwa siya sa iya balaan nga puluy-an. Ginahatagan niya sang gahom kag kusog ang iya katawhan. Dalayawon ang Dios!