×

Bukuit Ne Tilil 2020

TIENWOGIKAL 68

1
Ingong’eet Kamuktaindet, ingoiyesta bunikyik; Ak ingomwei eng’ tainnyi che wechei inendet.
2
Iyeste ichek ko u ye kiyestoi iyeto: Ko u ye chootei temeniet eng’ ye negite mat, Ko u noto ingolusyo kiptengeginik eng’ taitab Kamuktaindet.
3
Ago ingoboiboitu che bo imanda; ingogasgei eng’ taitab Kamuktaindet: Ee, ingoboiboitu eng’ kagasetab ge.
4
Otienji Kamuktaindet, otienji kainennyi kalosunoik: Ochopchi oret ne o inendet ne bunei ong’atosiek, ko u ne lanyei mbartanyit. Kainennyi ko JAH; ak ogasge eng’ tainnyi.
5
Kwandab che matinyei kwanda, ak ne tononjin mosogik, Ko Kamuktaindet eng’ gonnyi ne tilil.
6
Igochin Kamuktaindet che mi ichegei komeng’jin ak alak: Imutyin kimonjororinik borotet: Ago menyei bistoik emet ne yaamat.
7
Ee Kamuktaindet, ye kingaimande indoe biguk, Ye kiitiegoti ong’atet,
8
Kobotan ng’ony, Ak kororok kipsengwetisiek eng’ taitab Kamuktaindet: Kobotan Sinai noto eng’ taitab Kamuktaindet, Kamuktaindetab Israel.
9
Ee Kamuktaindet, kiiyogu ropta ne o, Ak kiigimit boroteng’ung’ ye kitinyei ng’etatet.
10
Kimeny oloto tuiyeng’ung’: Ee Kamuktaindet, kiichopchi che bo mieindang’ung’ kibananok.
11
Igoitoi Kiptaiyat ng’olyot: O lugetab kobogorisiek che mwaitoi ng’alek.
12
Mweei laitorinikab lugosiek, mweei: Ak kopchei kwondo ne ng’etu eng’ ga barunenik,
13
Agot ngirue biusiekab kechirek, Ko u kebebaikab cheptuget ne kigituge feda, Ak kororikyik che kigiile tahabu che talelionen.
14
Ye kiiyesta Ne bo Kamuktaet laitorinik eng’ oloto, Ko ki u ye ibuti teluchi eng’ Salmon.
15
Tulwetab Kamuktaindet ko tulwetab Basan; Tinyei tulwetab Basan walisiek che koen.
16
Amu nee si koamak ng’etkong’, okwek tulonok che koen, Agobo tulwet ne kigomach Kamuktaindet komeny? Ee, menyei Jehovah oloto koigeny.
17
Karisiekab Kamuktaindet ko elfusiek tiptem, agot elfusiek ak elfusiek: Mi Kiptaiyat kwenunywa, eng’ Sinai, eng’ ole tilil.
18
Kiitogoste barak, kiimut luulenik che kiiluul; Kiitaach bik koek kagochinoik, Ee, agot ngelelik agichek, si kobiit komeng’is Jehovah.
19
Iberurot Kiptaiyat, ne ibei betut age tugul milennyo, Kamuktaindet inendet ko yetunennyo.
20
Kamuktaindet eng’ achek ko Kamuktaindet ne bo sorunoik; Bo JEHOVAH Kiptaiyat ortinwek che kechilile eng’ meet.
21
Ago tuei Kamuktaindet metowekab bunikyik, Metitab chito ne wendote tengektanyi.
22
Kile Kiptaiyat, Amutu kogeny eng’ Basan, Amutu kogeny komong’une rirosiekab nyanjet:
23
Si kobiit irooch keldang’ung’ korotik, Si konyor ng’elyeptab seseniguk kebebertanyi eng’ bunik.
24
Kigogeer ichek banweguk, ee Kamuktaindet, Banwekab Kamuktaindennyu, Laitoriandennyu, agoi ole tilil.
25
Kiindo tienik, ak kiisubu che kibutei kibugandinik, Kimi kwen gotab kor che kibirei sugutisiek che mengechen.
26
Olosu Kamuktaindet eng’ tuiyosiek, Olosu Kiptaiyat, che ko bo kondametutab Israel.
27
Mitei Benjamin ne ming’in, bounindenywa, Mitei bounikab Juda ak tuiyenywa, Bounikab Sebulun, bounikab Naptali.
28
Kigong’at Kamuktaindeng’ung’ kimnateng’ung’: Igimit, ee Kamuktaindet, noto ne kiiyai agobo achek.
29
Ibun laitorinik kagochinoik Amu hekalung’ung’ eng’ Jerusalem.
30
Ker kong’ tiondab timin ne mi mutwek, Chang’indab kirugik, ak moekab bik, Koming’inonugei age tugul koibu feda; Kigoiyesta inendet bik che chamei boriet.
31
Tun mong’une bounik Misri; Iyogochin Etiopia eunekyik Kamuktaindet kochokyin.
32
Otienji Kamuktaindet, okwek bororiosiekab ng’ony; Otienji Kiptaiyat kalosunoik;
33
Inendet ne lanyei kipsengwetisiekab kipsengwetisiek, choto bo keny; Ogeero, twegu eng’ kutinnyi, kutit ne kim.
34
Ingobunji kimnatet Kamuktaindet: Mi telunatennyi Israel, Ak mi kimnatennyi baragusiek.
35
Ee Kamuktaindet, kiywein eng’ oldinweguk che tililen: Kamuktaindetab Israel, ne igochin bikyik kimnatet ak kamuktaet. Iberurot Kamuktaindet.
Kalenjin Bible 2020
God's word open for all Bible Society of Kenya, 2020
:
Save Notes