×

Mara Bible BSI 2023

Tingtoeng 7

1
Hy Abeipa ei Khazohpa, nâma ei châ chhai hih, Nâ chadaituhpa zydua tawhta na pachha mah y.
2
Chataleipatala chakeibarôhneipa hawhta ei hro chaphie aw ei ta, Pachhatuhpa hnei leipa ta ama hriechheih khai pathlei aw.
3
Hy Abeipa ei Khazohpa, He hawhpa hmo he vaw tao ha aw sah la, Ei kuzy liata adoleina y sala,
4
Moleina ta ei viasa viarithôpa ta, A chhâpa y leipa ta ei chariahpa a hraopa ei châ khiahta cha,
5
Ei chariahpa ta ei hro a chadai sala, Pha ha mawh sy; Ei hrona he alei liata tlypâ sala, Ei rônahna he dohlei liata soh mawh sy.
6
Hy Abeipa, na hiehâhpa ta thyu la, Ei chariahpazy ruchhôna thyuhnao mah y; Keima châta a hra la, Adona bie pathlu mah y.
7
Phopi a hmaohpakhypazy ta cha chadô ei sala, Chô lâ tawhta ama chô liata ryureih mah y.
8
Abeipa ta phopizy pachia ta, Hy Abeipa, ei sianazie hawhta na pachia la, Hy Chônôchaipa, ei dona hawhta na pachia mah y.
9
Hy Khazoh siapa, Hmoparaopazy moleina pachhâsa la, Mosiapazy padua mah y; Nâ cha pachâna nata palôhzy pasiatuhpa châ tlôh chi ta.
10
Ei vyhphao cha Khazohpa hnohta y ta, Ano cha palôh dopazy pachhatuhpa a châ.
11
Khazohpa cha pachiatuh dopa châ ta, Moleina kyh vâta noh chareih ta a hie a hâhpa Khazoh a châ.
12
Chyhsa ta a moleina a ro vei khiahta cha, Khazohpa ta a zaozi chata aw ta, A libaw a keipa ta â pachyh thlâh ha aw.
13
Thina chaihraizy a chhuahdy ha ta, Châtai ia theipazy a tao haw.
14
Moh teh u, moleipa ta paraona saw a zeih ta, Chhoruna saw phaoh ta, Haipa saw a sa tyh.
15
Khaohtlô chaopa ta leizaih pachha ta, Ano chaopa khaohtlô liata a tla tyh.
16
A hrochhiena ta ano luh chô liata a vaw lie thlu ta, A nôchhiena ta ano luh ru liata a tla thlu.
17
Abeipa cha a siana vâta a chô liata alyna bie reih aw na ta, Abeipa Chônôchaipa moh reithaina hla ei sa aw.
Chin BSI Bible 2023
The Bible Society of India 2023
:
Save Notes