|
| 1 |
|
| Euu Osolobuẹ, ịyụ kẹ m'e gbọnni! Dodo, anịkwọlẹ ifẹnrẹn mẹ m! |
|
| 2 |
|
| Dodo, zụọpụha m makẹni ị wụ onyẹ ezi-omumẹ; gọn m ntịn n'ị zụọpụha m! |
|
| 3 |
|
| Wụrụnị m ọmụma e che m nche, ebe m'a gbashi ogẹn ile; y'e kuọlẹ n'i k'a zụọpụha m, makẹni ịyụ wụ ọmụma m lẹ ebe m'a gbaban. |
|
| 4 |
|
| Chuku m, dodo gbapụha m ẹka eje-ịhịan, ẹka onyẹ-njọ, ẹfọ jọ. |
|
| 5 |
|
| Makẹni, ịyụ wụ Osolobuẹ kẹ m rị e lee ẹnya, ịyụ kẹ m gi e dọn ẹnya gha ẹhụ nwandu m lala. |
|
| 6 |
|
| Ịyụ kẹ m danbemẹ gha ẹfọ nnẹ m lala; ịyụ wepụha m ẹfọ nnẹ m. M k'a rị a ja ị mma ogẹn ile. |
|
| 7 |
|
| Ndị bu ọda hụ a gba m ilee, kanị, ịyụ wụ ebe zeni m'a gbaban. |
|
| 8 |
|
| Ọjịja-mma ị jun m ọnụ; m'e ku oku ọghọ ị kẹ ụhụọhịn han. |
|
| 9 |
|
| Dodo, ajụkwọlẹ m m kagụ ẹgẹdi; alatọkwọlẹ m ebe ndụn rịzịlẹni m. |
|
| 10 |
|
| Ndị-iṅẹnrẹn m hụ e ku oku m; ndị rị e ke m nke nị wẹ gbu m hụ e zuni m umẹ, |
|
| 11 |
|
| a sị, “Chuku a lagụọ a tọ, chụ n'a, nwụndọnn'ẹ, n'o nwọnni onyẹ k'a zụọpụhan'a!” |
|
| 12 |
|
| Chuku dodo nọkunmẹ m! Chuku m, bịakẹnrin d'e yeni m ẹka! |
|
| 13 |
|
| Ifẹnrẹn ya mẹgbu ndị rị e we iwe m; wẹ la iwi! Ifẹnrẹn ya mẹgbu ndị rị a chọ m njọ; wẹ fa; |
|
| 14 |
|
| Kanị, mmẹ nwẹn elebehikọ ẹnya eyemẹka ị; m k'a rị a ja ị mma furuni i, a jawaye. |
|
| 15 |
|
| M k'e ku ihiẹn ile rị mma y'e mẹ uhinhin lẹ efinaị; a gba m ọrụn nzụọpụha ị rụn, ọsụọn'a nị asakọ m ẹka gbachanrịn wẹ! |
|
| 16 |
|
| M k'a pụha d'e ku okẹn ihiẹn ndị Osolobuẹ wụ Chuku mẹ; m k'a nyanhannị wẹ nị y'a rịka mma, ịyụ sụọ. |
|
| 17 |
|
| Chuku, ị hụ a kuzi m gha ẹhụ nwa-ndu m lala; m hụkwọ e ku oku ọrụn atụmẹnya ị. |
|
| 18 |
|
| M kagụdẹ ẹgẹdi, pugụ ẹwọ, Chuku dodo, alakwọlẹ m tọ d'e ru mgbe m gwagụ agbọ lalanị oku ikẹn i, gwagụ ndị lalanị nị y'e hikẹ ogbe. |
|
| 19 |
|
| Chuku, ezi-omumẹ i jẹnkarị igwere elu! Y'e mẹ okẹn-ihiẹn! Chuku, onyẹ nọ kẹ yụ?! |
|
| 20 |
|
| Y'e mẹgụọ ẹnyi hụn nsọngbu lẹ afụnfụn, kanị y'e mẹgụọ ndụn banzị m; i k'a gha imẹ-imẹ alị wepụhazị m. |
|
| 21 |
|
| I k'e bushiwaye m elu; ị k'a kasịzị m obi. |
|
| 22 |
|
| M k'a kpọ ụbọ kpanmịn ị, Chuku m, makẹni ihiẹn i ku kẹ y'e mẹ; m k'a kpọ ụbọ gi ja ị mma, Onyẹ-nsọ alị Izrẹlụ. |
|
| 23 |
|
| M k'a gha e yi oro ịghọghọ ebe m rị a bụnị ị ẹbụ; umẹ-ndụn m ị zụọpụha k'a jazịkwọ ị mma. |
|
| 24 |
|
| Ọnụ m k'e ku ihiẹn rị mma i mẹ, kẹ ụhụọhịn han, makẹni o kpuyegụọ ndị rị a chọ m isi, a fagụọ wẹ. |
|
|
|
|