|
| 1 |
|
| Ayi Mukama, nzirukidde gy'oli; tondekanga kuswala mirembe gyonna; |
|
| 2 |
|
| mu butuukirivu bwo mponya, ndokola. Wunzikira gye ndi okutu kwo ondokole. |
|
| 3 |
|
| Mbeerera lwazi lwa buddukiro, ekigo ekinywevu bulijjo; walagira okumponya, anti ggwe lwazi lwange, ekigo kyange. |
|
| 4 |
|
| Ayi Katonda wange, nsika mu mikono gy'omubi, mu kikonde ky'ow'ettima omukambwe. |
|
| 5 |
|
| Kubanga, ayi Mukama, ggwe ssuubi lyange, obwesige bwange, ayi Mukama, okuva mu buvubuka bwange. |
|
| 6 |
|
| Okuva lwe nazaalibwa, nnyweredde ku ggwe; okuva mu nda ya nnyabo, ggwe onkuuma; bulijjo nnaakutenderezanga. |
|
| 7 |
|
| Bangi mbafuukidde ekikuuno, naye ggwe buddukiro bwange obunywevu. |
|
| 8 |
|
| Akamwa kange kajjudde ettendo lyo, olunaku lwonna kayimba ekitiibwa kyo. |
|
| 9 |
|
| Tonsuulirira mu kaseera ak'obukadde; tonjabulira kati ng'amaanyi gampwedde. |
|
| 10 |
|
| Anti abalabe bange banjogerako; abaliimisa obulamu bwange banneekobera wamu; |
|
| 11 |
|
| bagamba nti: “Katonda amwabulidde, mumuwondere, mumukwate, kubanga tewakyali amutaasa.” |
|
| 12 |
|
| Ayi Katonda, tonneesuuba; ayi Katonda wange, yanguwa okunnyamba. |
|
| 13 |
|
| Baswale, baggwemu ensa, abalwanyisa omwoyo gwange; abanoonya okunkola obubi babikkibwe ebivumo n'obuswavu. |
|
| 14 |
|
| Naye nze bulijjo nzija kusuubiranga; buli lunaku naddiŋŋananga ettendo lyo. |
|
| 15 |
|
| Akamwa kange kalirangirira obutuukirivu bwo, olunaku lwonna obulokozi bwo, anti n'okumanya simanyi we bwenkana. |
|
| 16 |
|
| Ndijja ne nnangirira ebikuuno byo, ayi Katonda Omuyinza; ndijjukira obutuukirivu bwo, ate obubwo wekka. |
|
| 17 |
|
| Ayi Katonda, wanjigiriza okuva mu buvubuka bwange, n'okutuusa kati ndojja ebyewuunyisa byo. |
|
| 18 |
|
| Na kati mu bukadde, nga mbunye envi, ayi Katonda, tonjabuliranga, ngira ntendera ezzadde lino ebikuuno byo, n'abalijja bonna, obuyinza bwo. |
|
| 19 |
|
| Obutuukirivu bwo, ayi Katonda butuuka ku ggulu; wakola ebinene, ayi Katonda, ani akwegezaako? |
|
| 20 |
|
| Newandibadde ng'ondabizza ennaku, ennyingi ate enkakali, kyokka oluvannyuma olimpa obulamu nate, nate olinzigyayo eyo ekkuzimu mu ttaka. |
|
| 21 |
|
| Olinnyongera obukulu, n'onkubagiza nate. |
|
| 22 |
|
| Nange ndikugulumiza ku ntongooli olw'obwesigwa bwo, ayi Katonda, ndikuyimbira ku nnanga, ayi Omutuukirivu wa Yisirayeli. |
|
| 23 |
|
| Emimwa gyange girijaganya bwe ndiba nkuyimbira, nze gwe wanunula. |
|
| 24 |
|
| Olunaku lwonna olulimi lwange lulimanyisa obutuukirivu bwo; kubanga abanoonya okunzikiriza baswadde, batoowaziddwa. |
|
|
|
|