×

Bukuit Ne Tilil 2020

TIENWOGIKAL 73

1
Iman mie Kamuktaindet eng’ Israel, Eng’ icheget che tililen mugulelwek.
2
Ago eng’ ane, ko ki negit komasta kelyekyuk; Ki negit kochabaita kakwautikyuk.
3
Amu kiama ng’etkong’ agobo che mendos, Ye kingageer kalyetab kiptengeginik.
4
Amu manyoru ng’wanindo; Chamegei borwekwak, ak ko kimen.
5
Matinyei icheget nyalilwogik ko u bik alak; Ama nyoru biret ko u bik alak.
6
Eng’ noto anyun u menotet sirimdo ne mi kaatwekwak; Katuch ichek koromnatet ko u ngoriet.
7
Ibwanotin konyekwak eng’ neratet: Tinyei tuguk che siirei che machei mugulelwekwak.
8
Chotisiei, ak mwaei sastaet eng’ tengekto: Ng’alaldos eng’ katororetab ge.
9
Kigotoror kutuswekwak agobo kipsengwetisiek, Ak kobendote ng’elyebwekwak ng’ony.
10
Eng’ noto anyun, weeksei bikyik oli: Ak lugui ichek beek che nyiitotin.
11
Ak kolen ichek, Naei nee Kamuktaindet? Tos mitei naet eng’ Inendet ne Toror Mising’?
12
Ogeero, kiptengeginik chuto; Mitei icheget kotugul eng’ kalyet; tesoksei eng’ magornatosiek.
13
Iman kiatilil muguleldanyu buch, Ak kiaune eunekyuk libwobindo buch;
14
Amu kaanyoru biret eng’ betut komugul, Ak kitigona karonet age tugul.
15
Nda kigamwa ale ang’alali ko u ni, Keero, ta kiga aberber ibindab lagoguk.
16
Ye kingacheng’ ole amuchi anaita nito, Kotemena;
17
Agoi among’ji oldab Kamuktaindet ole tilil, Anai anyun ole bochin kagesunenywa.
18
Iman igochini kotebe ichek komoswek che chaboen: Ak iwirjini ichek ng’ony koba ng’emisiet.
19
Katepto ano kot kosib kong’emogis ichek ngunoto! Kagowong’gei eng’ kamuisosiek.
20
U karuotitoet ye kagos chito; Ko u noto, ee Kiptaiyat, ye ing’eet inye, isase itondanywa.
21
King’wanit muguleldanyu, Ak kigitoor sobondanyu:
22
Kia abusat, amangen kiy; Kia u tiondo eng’ taing’ung’.
23
Agot nga u noto ami koboten kotugul: Kiinam eunnyu ne bo tai.
24
Inye ne indoiywa eng’ ruchineng’ung’, Ak eng’ let itaacha anyo oldab lilindo.
25
Ng’o ne atinye eng’ kipsengwet ne ma inye? Ama mi age ne amache eng’ ng’ony kosiirin.
26
Ichuchui bortanyu ak muguleldanyu: Ago Kamuktaindet kimnatetab muguleldanyu ak kebebertanyu koigeny.
27
Amu keero, betos icheget che looen eng’ inye: Amu kiing’em ichek tugul che kiisub ibetab ge koistoenengei.
28
Ago mie eng’ ane arikyi Kamuktaindet: Kiacham koek Kiptaiyat Jehovah ole amwechini, Si kobiit amwaita boisioniguk tugul.
Kalenjin Bible 2020
God's word open for all Bible Society of Kenya, 2020
:
Save Notes