×

Ika Bible 2018

Ẹbụ-ọma 74

1
Euu Chuku k'ị jụnị ẹnyi jẹnrin ejẹn? K'ị tọnị e buni atụnrụn ị olulu?
2
Nyanhankwọ ndị nke i hụn i nwọnrin ẹdẹi, ndị hụn ị gbarị nị wẹ wụrụ ebọn nke i. Nyanhan Ugu Zayọnụ rị Jerusalẹm, ebẹhụ ị bịa d'e biri.
3
Dodo d'e ledẹ mkpọkọ ụlọ ndị ahụn: ihiẹn hụ ile eṅẹnrẹn tikpọ imẹ Ụlọ-nsọ!
4
Ndị-iṅẹnrẹn i a nọgụọ Ụlọ-nsọ ị yi oro n'e mẹri wẹ; e bugụọdẹ wẹ ahịma wẹ che ebẹhụ!
5
Ọ nọ kẹ ebe ndị e gbu osisi nọ bu anyụn banye ọfịa d'e gbu osisi.
6
Wẹ rị nwan e gi anyụn lẹ igwe a kụkpọchanrịn ihiẹn ile wẹ gi osisi rụn ebẹhụ.
7
A dụngụọ wẹ Ụlọ-nsọ ị ọkụn ru alị; e mẹrụgụọ wẹ ebẹhụ rị a za ẹfan ị.
8
Wẹ sị enwẹn wẹ, “Nị ẹnyi bịangbuchanrịn wẹ!” E gigụọ wẹ ọkụn dụnpụchanrịn ebe ile ẹnyi nọ e fe Chuku imẹ alịnị.
9
Ẹnyi arịzị a hụn ọrụn-atụmẹnya ndị ẹnyi gi marịn ị; onwọnzini onyẹ-amụma họdụnị; onwọnzikwọnị onyẹ nke ẹnyi marịn kẹ ụyanị k'e biehan!
10
Euu Chuku, elee mgbe kẹ ndị-iṅẹnrẹn k'a mụbehi ẹnyi ẹmụ?! Nị wẹ kpọlịa ẹfan ị jẹnrin ejẹn?
11
K'ị jụnị nị y'a tịnpụkọ ẹka-nni tikpọ wẹ? K'ị kụmanị ẹka?!
12
Kanị Chuku wụ eze m gha alị lala, eze hụn a zụọpụhasọnmẹ ịhịan elu-ụwanị:
13
Ịyụ gi ikẹn i kebe ohimin ahụn, kụkpọpụchanrịn eje-anụ ahụn rị imẹ ohimin isi ẹ ile;
14
ịyụ gwerinrin eje-anụ ohimin wụ Lẹvịatanị isi ẹ ile, ị nọ tụ ẹhụ a yeni ndị bi imẹ atụ ri.
15
Ịyụ gbawa alị, mirin nọ gbapụhama, iyi e huru; ịyụ mẹzikwọ iyi hụn ghalẹni a tahị, tahị.
16
Efinaị wụ nke i, uhinhin wụzịkwọ nke i; ịyụ ke ẹnyanwụn lẹ ukpẹ ile rị igwere, bu wẹ che ebe wẹ rị;
17
ịyụ tumẹsọnmẹni ụwa ebe ile o ru; ịyụ tumẹ udu-mirin lẹ ọkọkị.
18
Euu Osolobuẹ, nyanhankwọ ẹmụ ndị-iṅẹnrẹn rị a mụ ị, lẹ ọkpọlịa ndị marịnlẹni ihiẹn rị a kpọlịa ẹfan ị.
19
Dodo, ebukwọlẹ ndụn nduru i che ẹka ndịnị, ẹka eje-anụ! Dodo azọlẹ ndị nke i jẹnrin ejẹn tọ ẹka ndị rị a bịangbuni wẹ!
20
Dodo, nyanhan nkwa ị, makẹni egbu-lẹ-egbu e jungụọ ebe ile gba ishi imẹ alịnị.
21
Anịlẹ ụya ri ndị wẹ rị a zọ ụkụ isi, ka mẹni ndị wẹ rị a bịangbu lẹ ndị mkpa gi, ihiẹn wẹ e gi ja ị mma.
22
Chuku dodo, lihi nwan, n'i kinrin ọnụ ị! Nyanhan kẹ ndịnị marịnlẹni ihiẹn dọn rị a mụ ị ẹmụ uhinhin lẹ efinaị!
23
Azọkwọlẹ mban ile ndị-iṅẹnrẹn i rị a ban, mkpọtụ ile ndị-iṅẹnrẹn i rị e mẹ ogẹn ile.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes