×

Maayong Balita 2012

SALMO 74

1
O Dios, ngaa bala ginpatumbayaan mo kami sing subong sini? Magakaakig ka bala sing dayon sa imo kaugalingon nga mga tawo?
2
Dumdoma man ang imo mga tawo, nga imo ginpili nga mangin-imo halin pa sang una, ang mga tawo nga imo ginpagwa sa pagkaulipon agod mangin-imo kaugalingon nga tribo. Dumdoma ang Bukid sang Sion, sa diin ikaw nag-estar!
3
Kadtoi ining bug-os nga mga ginub-an, ang amon mga kaaway nagguba sang tanan nga mga butang sa Templo!
4
Ang imo mga kaaway nagahinugyaw sa pagdaog didto sa imo Templo, ginpahamtang nila ang ila mga bandera didto subong mga tanda sang pagdaog.
5
Kaangay sila sang mga manugkahoy nga nagapulod sang mga kahoy paagi sa ila mga wasay.
6
Ginguba nila sang ila mga wasay kag mga maso ang tanan nga bahin sang Templo nga nahimo sa kahoy.
7
Ginguba nila ang imo Templo kag ginsunog ini, gindagtaan nila ang lugar sa diin ikaw ginasimba.
8
Nagpamat-od sila sa paglaglag sa amon sing bug-os, ginsunog nila ang tanan nga balaan nga lugar sa duta.
9
Ang tanan namon nga balaan nga mga tanda wala na, wala na sing nabilin nga mga propeta, kag wala sing may makahibalo kon tubtob san-o ini.
10
O Dios, tubtob pa bala san-o ang pagyaguta sa imo sang amon mga kaaway? Magapasipala bala sing dayon sila sang imo ngalan?
11
Ngaa bala wala ka magbulig sa amon? Ngaa bala nagakrusimano ka lang?
12
Pero ikaw, O Dios, ang amon hari halin pa sa ginsugoran, ginbuligan mo kami sa paglutos sang amon mga kaaway sa diin kami nagaestar.
13
Sa imo gamhanan nga kusog ginpihak mo ang dagat kag gindugmok mo ang mga ulo sang dalagku nga mga sapat sa dagat,
14
ginbuka mo ang mga ulo sang daku nga sapat nga Lebiatan, kag ginhatag mo ang iya patay nga lawas agod kaunon sang mga sapat nga nagaestar sa desierto.
15
Ginpailig mo ang mga tuboran kag ang mga sapa, ginpamala mo ang dalagku nga mga suba.
16
Gintuga mo ang adlaw kag ang gab-i, ginpahamtang mo ang adlaw kag ang bulan sa ila kaugalingon nga mga lugar.
17
Ginpahamtang mo ang mga dulonan sang duta, ikaw ang naghimo sang tig-ilinit kag tig-ulolan.
18
Pero dumdoma, O Ginoo, nga ang imo mga kaaway nagayaguta sa imo, nga sila mga buangbuang kag nagatamay sa imo.
19
Indi man pagpabay-i ang imo mga tawo nga wala sing ikasarang sa mapintas nila nga mga kaaway, indi man pagkalimti ang imo mga tawo nga ginahingabot!
20
Dumdoma man ang kasugtanan nga imo ginhimo sa amon. May pagpamintas sa tagsa ka madulom nga bahin sang duta!
21
Indi pag-itugot nga mahuy-an ang mga ginapigos, tugoti nga ang mga imol kag ang mga nawad-an magdayaw sa imo.
22
Tindog ka, O Dios, kag apini ang imo kaugalingon nga kawsa! Dumdoma nga ang mga di-diosnon nagayaguta sa imo sa bug-os nga adlaw!
23
Indi pagkalimti ang mga singgit sang imo naakig nga mga kaaway, ang wala nagauntat nga ginahod sang imo mga kasumpong.
Ilonggo Bible 2012
Maayong Balita nga Biblia Philippine Bible Society, 2012
:
Save Notes