×

Ekitabo Erikwera 2008

Zaaburi 74

1
Ai Ruhanga, okatunagira ki ebiro byona? Ahabw'enki noogirira entaama z'omu iriisizo ryawe ekiniga kingi?
2
Ijuka abantu baawe abu waayetungiire ira, eihanga rwawe ahabwawe eri waacungwire, n'orushozi Siyooni oru waabaire otuuraho.
3
Za omu mwanya ogutuura guri eitongo; ahi abazigu bahwerekyerereize byona eby'omu mwanya ogurikwera.
4
Bakatontomerera ahi waabaire obugabuganira naitwe; bakahanika aha irembo endango zaabo,
5
endango ezi tutakareebaga.
6
Bakataahirira ebiti by'amarembo, bakabisheenyagura n'empango n'akateererezo.
7
Ai Ruhanga, baakootsya omwanya gwawe ogurikwera, baahagariza kimwe ahi bakuramiza.
8
Baagira omu mitima yaabo bati: Ka tubahwerekyereze! Baayotsya amaramizo gaawe goona ag'omuri egi nsi.
9
Titwakireeba bumanyiso bwawe, tihaakiriho murangi n'omwe. N'oha omuriitwe orikumanya ahu ebi birigarukira?
10
Ai Ruhanga, omubisha aryahitsya hi okurogota? Omuzigu aryaguma ajume eiziina ryawe ebiro byona?
11
Ahabw'enki tokibanga mukono gwawe gwa buryo? Ahabw'enki ogubindiire aha kifuba?
12
Kwonka Ruhanga, niiwe Mukama waitu okwiha ira ryona, otuura ori omujuni waitu omu nsi.
13
Enyanja okagibaganisamu kabiri n'amaani gaawe, waasheenyagurira emitwe y'enkooko aha maizi.
14
Niiwe waasheenyagwire emitwe y'orukooko rw'omu nyanja, okaruha enyamaishwa z'omu ihamba kururya.
15
Okaigurira enshuro n'akagyera, waayomya emigyera etooma.
16
Niiwe waahangire nyomushana na nyekiro, okata eizooba n'okwezi omu myanya yaabyo.
17
Niiwe waataireho enyatano z'omu nsi yoona, okahanga ekyanda n'eitumba.
18
Ai Nyakubaho, ijuka okurogota kw'abo bazigu baawe, n'oku ebifamutima bikujuma.
19
Itwe abataine geehwera, otatushunikira abo bantu bataine saasi; oteebwa abantu baawe abarikubonabonesibwa ebiro byona!
20
Ijuka endagaano yaawe. Buri nyanga neekorerwamu eby'obubisha.
21
Otareka abarikubonabonesibwa kuhemurwa. Abooro n'abakyene ka bakuhimbise!
22
Ai Ruhanga, imuka orwanirire ebyawe; oijukye oku ebifamutima bisiiba nibirogota!
23
Oteebwa orwari rw'abazigu baawe, n'okuyogoora kw'ababisha baawe okutarikuremuura!
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes