×

MUMA MALER 1976

Zaburi 75

1
Wagoyoni erokamano, A Nyasaye. Ee, wagoyoni erokamano. Wahulo kaka iduong’, kendo walando gik madongo misetimo.
2
Nyasaye wacho niya, “Ka kinde ma aseketo mondo ong’adie bura ochopo, to abiro ng’ado bura.
3
Kata obedo ni piny oyiengni, mi ji duto modakie kihondko omako, to an ema nagur mise mage motegno.
4
Akwero josunga niya, ‘Weuru sungoru!’ Joricho bende akwero ni, owe kawore.
5
Ee, awachonigi giduto mondo giwe timbegi mag sunga gi mag tok teko.”
6
Teko mar ng’ado bura ok wuog yo wuok chieng’ kata yo podho chieng’. Bende ok owuog yo nyandwat kata yo milambo,
7
to Nyasaye e jang’ad bura. Odwoko ji moko piny, to moko oting’o malo.
8
Ruoth Nyasaye oting’o kikombe mar divai mochiek makech e lwete, kendo ogamo ni ji mondo omadhi. Joricho duto onego madhe pep, koda ka duche!
9
An to abiro pako Nyasach Jakobo. Ee, abiro pake gi wer nyaka chieng’.
10
Enotiek teko joricho, to teko mar joma kare nomedre ameda.
Luo Bible 1976
Dholuo DC Bible Bible Society of Kenya and Bible Society of Tanzania, 1976
:
Ket weche mandiki