×

現代台語譯本羅馬字版

詩篇 77

1
Góa beh tùi Siōng-tè tōa-siaⁿ kiû-kiò, tùi Siōng-tè chhut tōa-siaⁿ, I ōe àⁿ hī-khang thiaⁿ.
2
Tī hoān-lān ê ji̍t góa chhē Chú, tī mî--sî gia̍h-chhiú kî-tó bô-thêng; góa ê sim m̄-khéng siū an-ùi.
3
Góa siàu-liām Siōng-tè, chiū thó͘-khùi ai-oàn; góa chēng-chēng siūⁿ, chiū lóe-chì sit-bāng.
4
Lí hō͘ góa ba̍k-chiu kim-khok-khok khùn bōe khì; góa hoân-ló kah lóng bōe kóng-ōe.
5
Góa tui-liām kè-khì ê ji̍t-chí, hôe-sióng kó͘-chá ê nî.
6
Góa mî--sî chēng-chēng siūⁿ; góa bong sim-koaⁿ ka-kī mn̄g, sim-sîn siông-sè séng-chhat.
7
Chú kiám ōe éng-oán pàng-sak lán? I kiám bōe koh si-un hō͘ lán?
8
I ê chû-ài kiám ōe éng-kiú siau-sit? I ê èng-ún kiám ōe éng-oán lo̍k-khong?
9
Siōng-tè kiám bōe-kì-tit si-un, kiám í-keng ēng siū-khì tāi-thòe I ê chû-pi?
10
Góa kóng, “Góa siōng thòng-sim--ê, chiū-sī Chì-koân Siōng-tè bô koh ū khùi-la̍t.”
11
Góa beh kóng-khí Siōng Chú lí ê chok-ûi, siàu-liām lí chá-sî ê sîn-jiah.
12
Góa beh chhim-su lí ê chok-ûi, chēng-chēng siūⁿ lí ê só͘-chòe.
13
Siōng-tè ah, lí ê tō-lō͘ sîn-sèng; kiám ū sîn-bêng chhin-chhiūⁿ lí chiah-ni̍h úi-tāi?
14
Lí sī kiâⁿ kî-sū ê Siōng-tè; lí bat tī bān-bîn tiong hián-sī lí ê koân-lêng.
15
Lí bat ēng lí ê chhiú sio̍k-hôe lí ê chú-bîn, kái-kiù Ngá-kok kap Iok-sek ê kiáⁿ-sun.
16
Siōng-tè ah, tōa-chúi kìⁿ-tio̍h lí, tōa-chúi kìⁿ-tio̍h lí lóng kiaⁿ-hiâⁿ; chhim-ian mā ngia̍uh-ngia̍uh-chhoah.
17
Ba̍t-hûn piàⁿ-lo̍h hō͘-chúi, kiong-chhong tân-lûi, lí ê sih-nà sì-kòe siā.
18
Kńg-lê-á-hong lāi-bīn ū lí tân-lûi ê siaⁿ; sih-nà ê kng sih kàu choân-tōe; tōe ngia̍uh-ngia̍uh-chhoah tōa iô-tāng.
19
Hái-tiong ū lí ê tō-lō͘, tōa-chúi tiong ū lí ê lō͘-kèng; lí ê kha-jiah bô lâng chai.
20
Lí bat ēng Mô͘-se A-lûn ê chhiú, chhōa lí ê chú-bîn chhin-chhiūⁿ teh chhōa iûⁿ-kûn.
Chinese TTVR
The Bible Society in Taiwan
:
保存笔记