1
Nagapanawag ako sing mabaskog sa Dios, nagapanawag ako, kag ginapamatian niya ako.
2
Sa tion sang kalisod nagapangamuyo ako sa Ginoo, sa bilog nga gab-i ginabayaw ko ang akon mga kamot sa pagpangamuyo, pero ako wala sing naagom nga kalipay.
3
Ginapanumdom ko ang Dios, kag nagapanghayhay ako, nagapamalandong ako, kag nawad-an ako sing paglaom.
4
Wala niya ako ginapatulog sa bilog nga gab-i, nagpalibog gid ako sa bagay nga indi ako makahambal.
5
Ginapanumdom ko ang mga adlaw nga nagliligad kag ang madugay na nga mga tinuig.
6
Nagpalibog ako sa bug-os nga gab-i, nagapamalandong ako, kag amo ini ang ginapamangkot ko sa akon kaugalingon:
7
“Magapadayon bala ang Ginoo sa pagsikway sa aton? Indi na gid bala sia malipay liwat sa aton?
8
Wala na bala sia nagahigugma sa aton? Indi na bala masaligan ang iya mga saad?
9
Wala na bala ang Dios sing kaluoy? Nabayluhan bala sing kaakig ang iya kaluoy?”
10
Dayon nagsiling ako, “Ang nalainan gid sang akon buot amo nga ang Labing Mataas wala na gabulig sa amon.”
11
O Ginoo, dumdomon ko ang imo dalagku nga mga binuhatan, indi ko pagkalimtan ang imo katingalahan nga mga buhat sang una.
12
Dumdomon ko ang tanan nga imo ginhimo, pamalandungan ko ang tanan mo nga dalagku nga mga binuhatan.
13
O Dios, ang tanan nga imo ginahimo balaan! Wala sing iban nga dios nga gamhanan subong sa imo.
14
Ikaw amo ang Dios nga nagahimo sang mga milagro, ginpakita mo ang imo kusog sa mga kapungsoran.
15
Sa imo gahom ginluwas mo ang mga tawo, ang mga kaliwat ni Jacob kag ni Jose.
16
Sang makita ikaw sang mga tubig, O Dios, hinadlukan sila, kag ang mga kadadalman sang dagat nagkurog.
17
Ang mga gal-om nagbubo sing ulan, nagpanaguob gikan sa langit, kag nagpangilat sa bisan diin.
18
Ang imo pagdaguob nabatian, kag ang mga kilat nagpasanag sang kalibutan, ang duta nagkurog kag nagtay-og.
19
Gin-ubog mo ang dagat, gintabok mo ang madalom nga mga kalalawran, pero ang inagyan sang imo mga tiil indi makit-an.
20
Gintuytoyan mo ang imo mga tawo kaangay sang manugbantay sang karnero, nga gintatap ni Moises kag ni Aaron.
Ilonggo Bible 2012
Maayong Balita nga Biblia Philippine Bible Society, 2012